اقوام متحدہ میں پاکستان کے مستقل مندوب منیر اکرم نے افغانستان کی صورتحال پر اقوام متحدہ کے اجلاس سے اہم خطاب کیا۔ اپنے خطاب میں انہوں نے کہا کہ پاکستان میں آپریٹ کرنے والے دہشتگردوں کو طالبان کی افغان عبوری حکومت کی حمایت حاصل ہے۔
منیر اکرم نے کہا کہ افغان عبوری حکومت کی حمایت کالعدم تنظیم ٹی ٹی پی کو حاصل ہے جو دہشتگردانہ کارروائیوں میںملوث ہے، انہوں نے مزید کہا کہ پاکستان ہر سطح پر اس دہشتگرد تنظیم کے خلاف کارروائیاں کرتا رہے گا۔ ان کا کہنا تھا کہ پاکستان علاقائی اور بین الاقوامی تنظیموں کے ساتھ تعاون کرنے کیلئے تیار ہے تاکہ کالعدم تنظیم کے خطرے کو ختم کیا جا سکے۔ ان کا کہنا تھا کہ افغان حکومت اپنی بین الاقوامی ذمہ داریوں پرعمل کرے، بین الاقوامی برادری افغانستان میں اپنے مقاصد کو نظر انداز نہ کرے۔
