خیبر پختونخوا میں تقریباً 4 ہزار قومی شناختی کارڈز کو مشکوک قرار دے دیا گیا ہے، جن میں ذرائع کے مطابق بڑی تعداد ایسے کارڈز کی ہے جو مبینہ طور پر دہشت گردوں کو جاری کیے گئے تھے۔
ذرائع کے مطابق نادرا نے مشکوک شناختی کارڈز کی تصدیق اور انکوائری کا باقاعدہ آغاز کر دیا ہے، جبکہ متعلقہ افراد کو طلبی کے نوٹس بھی جاری کیے جا رہے ہیں۔
ذرائع کا کہنا ہے کہ مشکوک شناختی کارڈز کی بڑی تعداد ضم شدہ اضلاع سے جاری ہوئی، تاہم بندوبستی اضلاع میں بھی قابلِ ذکر تعداد میں ایسے کارڈز جاری ہونے کا انکشاف ہوا ہے۔
نادرا نے کارروائی کے دوران بڑی تعداد میں شناختی کارڈز بلاک کر دیے ہیں، جبکہ بلاک شدہ شناختی کارڈز کی بحالی کے لیے سخت شرائط بھی مقرر کر دی گئی ہیں۔
نادرا کی جانب سے جاری تصدیقی عمل مکمل ہونے کے بعد ہی ان شناختی کارڈز کے بارے میں حتمی فیصلہ کیا جائے گا۔
