نیو میکسیکو کے جنوبی علاقے میں آتشزدگی کے باعث 2 افراد ہلاک ہو گئے جبکہ اس کے ساتھ ہی سینکڑوں کی تعداد میں مکانات جل کر راکھ ہوگئے ہیں۔اس آتشزدگی کی وجہ سے ہزاروں افراد نقل مکانی کر گئے ہیں۔
غیر ملکی خبررساں اداروں کے مطابق نیو میکسیکو کے پہاڑی علاقے روئیڈوسو میں آتشزدگی کے باعث 1400 مکانات جبکہ دیگر اسٹرکچر بھی تباہ ہو گئے ہیں۔ تقریبا 8000 افراد کو محفوظ مقامات پر منتقل کر دیا گیا۔نیو میکسیکو پولیس کے مطابق جلی ہوئی گاڑی کی ڈرائیونگ سیٹ سے ایک نامعلوم شخص کی مکمل جلی ہوئی لاش ملی جبکہ ایک اور 60 سالہ شخص کی ہلاکت کی تصدیق ہوگئی ہے۔
امریکی صدر جو بائیڈن سے نیو میکسیکو کے گورنر مشل لوجان گرسھیم نے آتشزدگی سے متاثر ہونے والے 2300 ایکڑ رقبے پر محیط علاقے کو آفت زدہ قرار دینے کی درخواست کی ہے۔ نیو میکسیکو کو رپورٹس کے مطابق اس وقت گزشتہ 3 دہائیوں کی بدترین خشک سالی کا سامنا کرنا پڑ رہاہے جس کی وجہ سے جنگل کی آگ مزید خطرناک بن گئی ہے۔یاد رہے کہ 2022 میں نیو میکسیکو کو براعظم امریکا کی بدترین آتشزدگی کا سامنا کرنا پڑا تھا جس کے باعث 3 لاکھ 41 ہزار ایکٹر پر محیط رقبہ جل کر راکھ ہو گیا تھا۔
