شمالی وزیرستان میں سکیورٹی فورسز کی کارروائیوں میں فتنہ الخوارج کے27 دہشت گرد ہلاک ہوگئے، آئی ایس پی آر کا کہنا ہے کہ ہلاک دہشتگردوں میں میران شاہ کی ممتاز شخصت ملک سیف اللہ داوڑ کے ٹارگٹ کلرز بھی شامل تھے ۔
پاک فوج کے شعبہ تعلقات عامہ کی جانب سے جاری بیان کے مطابق سکیورٹی فورسز نےگزشتہ 72 گھنٹوں کے دوران قبائلی ضلع شمالی وزیرستان کے علاقے میرعلی اور میران شاہ میں خوارج کے متعدد ٹھکانوں پرکارروائیاں کیں ۔
آئی ایس پی آر کے مطابق کارروائیوں کے دوران دہشتگردوں کے ساتھ شدید فائرنگ کے تبادلوں میں فتنہ الخوارج کے27 دہشت گرد ہلاک ہوگئے ۔
آئی ایس پی آر کا کہنا ہےکہ ہلاک دہشتگردوں کے قبضے سے اسلحہ اورگولہ بارود بھی برآمد کیا گیا، یہ عناصر متعدد دہشت گرد کارروائیوں اور بےگناہ شہریوں کی ٹارگٹ کلنگ میں ملوث تھے ۔
آئی ایس پی آر کے مطابق دہشت گردوں کی ہلاکت سے میران شاہ میں ممتاز شخصیت شہید ملک سیف اللہ داوڑ کی ٹارگٹ کلنگ کا بدلہ بھی لے لیا گیا، اس گھناؤنے جرم کے مرتکب عناصر کو انجام تک پہنچادیا گیا ۔
آئی ایس پی آر کا کہنا ہےکہ علاقے میں چھپے مزید خوارج کے خاتمےکے لیےکلیئرنس آپریشنز جاری ہیں، سکیورٹی فورسز اور قانون نافذ کرنے والے ادارے عزم استحکام کےمطابق کارروائیاں جاری رکھیں گے، ملک سے بیرونی سرپرستی یافتہ دہشت گردی کے مکمل خاتمے تک انسداد دہشت گردی مہم جاری رہےگی ۔
