کوہستان میں خواتین کی انتخابی مہم کے خلاف فتوے پر الیکشن کمیشن آف پاکستان نے نوٹس لیا ہے۔ الیکشن کمیشن نے واضح کیا ہے کہ ایسی کسی بھی کوشش کرنے والوں کے خلاف کارروائی کی جائے گی جس سے خواتین امیدواروں یا ووٹروں کو روکا جا رہا ہو۔
ترجمان الیکشن کمیشن کا کہنا ہے کہ ڈی آر او کوہستان اپر سے رپورٹ طلب کرلی گئی ہے، ڈی آر او نے رپورٹ میں واضح کیا ہے کہ ایسی اطلاعات درست نہیں۔
الیکشن کمیشن آف پاکستان نے انتباہ جاری کیا ہے کہ اگر خواتین کو انتخابی عمل سے باہر رکھنے کی کوشش کی گئی تو الیکشن ایکٹ کی دفعہ 9 کے تحت ذمہ داروں کیخلاف کارروائی کی جائے گی اور ایسے اقدام پر حلقے میں انتخابات کا عمل کالعدم بھی قرار دیا جاسکتا ہے۔
واضح رہے کہ مقامی جریدے کی رپورٹ کے مطابق ضلع بالائی کوہستان کے علاقے میں علماء کے اجلاس کے بعد اعلان کیا گیا تھا کہ خواتین کا گھر گھر جاکر ووٹ مانگنا شریعت کیخلاف ہے۔ رپورٹ کے مطابق خواتین کی انتخابی مہم کیخلاف فتویٰ 30 مذہبی اسکالرز نے جاری کیا تھا۔
