حکومت پنجاب نے اڈیالہ جیل راولپنڈی کے ڈپٹی سپرنٹنڈنٹ محمد اکرم اور اسسٹنٹ سپرنٹنڈنٹ ریاض خان سمیت 4 اہلکاروں کو ملازمت سے برطرف کر دیا ہے۔ اس ضمن میں محکمہ داخلہ پنجاب کی جانب سے برطرفی کا نوٹیفکیشن بھی جاری کر دیا گیا ہے۔
اعلامیے کے مطابق ایک قیدی کے قتل کی انکوائری میں قصوروار ثابت ہونے پر اہلکاروں کو برطرف کیا گیا۔ یاد رہے اڈیالہ جیل کے ذہنی مریضوں کے سیل میں 29 فروری کو قیدی کے قتل پر انکوائری جاری تھی، آئی جی جیل خانہ جات پنجاب نے قتل کے واقعہ پرانکوائری کا حکم دے رکھاتھا۔ نوٹیفکیشن کے مطابق انکوائری میں ڈپٹی سپرنٹنڈنٹ محمد اکرم سمیت 7 ملازمین کو قصوروار قرار دیا گیا تھا، انکوائری 7 میں سے 4 اہلکاروں کو نوکری سے فارغ کرنے کی سفارش کی گئی تھی۔
واضح رہے کہ کچھ عرصہ اڈیالہ جیل میں بانی پی ٹی آئی عمران خان کی سہولت کاری کے الزام میں سابق ڈپٹی سپرنٹنڈنٹ محمد اکرم سمیت دیگر جیل افسران اور اہلکاروں کو تحویل میں لیا گیا تھا تاہم بعد ازاں محمد اکرم کو رہا کر دیا گیا تھا۔
