وزیر اعلی خیبر پختونخوا علی امین گنڈاپور کی خصوصی ہدایات کے مطابق کرغزستان سے خصوصی پرواز کے ذریعے پشاور آنے والے طلبہ کو وزیراعلی ہاوس میں ٹھہرایا گیا ہے۔
اعلامیہ کے مطابق وزیراعلیٰ ہاوس میں بشکیک سے آنیوالے طلبہ کی رہائش اور ان کیلئے خوراک کا خصوصی انتظام کیا گیا ہے۔واضح رہے کہ ان طلبہ میں کے پی کے علاوہ دیگر صوبوں کے طلبہ بھی شامل ہیں۔
ذرائع کے مطابق پشاور پہنچنے والے ان تمام طلبہ کو کل خصوصی گاڑیوں کے ذریعے ان کے آبائی علاقوں کی جانب روانہ کیا جائے گا۔وزیراعلیٰ خیبر پختونخوا علی امین گنڈاپور کی خصوصی ہدایات کے پیش نظر ان طلبہ کے سفری اخراجات صوبائی حکومت برداشت کرے گی۔اعلامیہ کے مطابق ممبر قومی اسمبلی فیصل امین گنڈاپور اور صوبائی وزراء بھی کرغزستان سے پشاور ائیرپورٹ آنے والے طلبہ کے استقبال کیلئے ایرپورٹ پر ہی موجود تھے۔
