سڈنی ٹیسٹ کے پہلے روز پاکستان کی ٹیم پہلی اننگز میں 313 رنز بنا کر آؤٹ ہو گئی جبکہ آسٹریلیا نے بغیر کسی نقصان کے 6 رنز بنا لیے ہیں۔
اس سے پہلے پاکستان نے ٹاس جیت کر بیٹنگ کا فیصلہ کیا لیکن بدقسمتی سے پاکستان کی جانب سے اننگ کا آغاز کرنے کیلئے آنے والے دونوں بیٹس مین عبداللہ شفیق اور ڈیبیو کرنے والے صائم ایوب بغیر کوئی رن بنائے آئوٹ ہو گئے۔
عبداللہ شفیق صرف دو گیندیں کھیلے انہیں مچل اسٹارک نے اسمتھ کے ہاتھوں کیچ آؤٹ کیا۔صرف دو ہی گیندیں کھیلنے کے بعد صائم ایوب بھی ہیزل وڈ کی گیند پر وکٹ کیپر ہاتھوں میں کیچ تھما کر پویلین لوٹ گئے۔
شان مسعود نے 35 اور بابر اعظم نے 26 رنز بنائے۔ پاکستان کو پانچواں نقصان سعود شکیل کی صورت میں ہوا وہ 5 رنز کے مہمان ثابت ہوئے، 5 وکٹیں جلد گرنے کے بعد محمد رضوان اور سلمان علی آغا نے اپنی ٹیم کا اسکور آگے بڑھایا لیکن 190 کے مجموعے پر رضوان 88 رنز کی اننگز کھیل کر آؤٹ ہو گئے۔ ساجد خان نے 15 رنز بنائے اور سلمان علی آغا نے اپنے ٹیسٹ کیرئیر کی چھٹی نصف سنچری مکمل کی،وہ 53 رنز بنا کر مچل اسٹارک کی گیند پر کیچ آؤٹ ہوئے۔حسن علی کوئی رن نہ بنا سکے۔
نو وکٹیں گرنے کے بعد نوجوان آل رائونڈر عامر جمال نے فاسٹ بائولر میر حمزہ کے ساتھ مل کر ٹیم کا اسکور آگے بڑھایا اور اپنے ٹیسٹ کیرئیر کی پہلی نصف سنچری اسکور کی، انہوں نے 4 چھکوں اور 8 چوکوں کی مدد سے 82 رنز کی اننگز کھیلی اور وہ ناتھن لیون کا شکار بنے۔
آسٹریلیا کی جانب سے پیٹ کمنز نے 5 کھلاڑیوں کو آؤٹ کیا جبکہ مچل اسٹارک کے حصے میں دو وکٹیں آئیں، ایک ایک کھلاڑی کو جوش ہیزل ووڈ، مچل مارش اور ناتھن لیون نے آؤٹ کیا۔
سڈنی ٹیسٹ کیلئے پلیئنگ الیون میں کپتان شان مسعود، صائم ایوب، عبداللہ شفیق، بابراعظم، سعود شکیل، محمد رضوان، سلمان علی آغا، ساجد خان، حسن علی، میر حمزہ اور عامر جمال کو شامل کیا گیا ہے۔
