اسلام آباد: فریضۂ حج کی ادائیگی کے بعد پاکستانی عازمینِ حج کی وطن واپسی کا سلسلہ باقاعدہ طور پر شروع ہو گیا ہے۔ جدہ سے آنے والی پہلی بعد از حج پرواز 114 حاجیوں کو لے کر اسلام آباد انٹرنیشنل ایئرپورٹ پہنچ گئی۔
اسلام آباد انٹرنیشنل ایئرپورٹ پر حاجیوں کا پرتپاک استقبال کیا گیا۔ اس موقع پر چیف آپریٹنگ آفیسر آفتاب گیلانی، ایئرپورٹس سیکیورٹی فورس (اے ایس ایف) کے حکام اور قومی ایئرلائن کے اعلیٰ افسران بھی موجود تھے۔
قومی ایئرلائن کے مطابق بعد از حج فلائٹ آپریشن کے تحت ملک کے مختلف شہروں کے لیے خصوصی پروازوں کا سلسلہ جاری رہے گا تاکہ عازمین کو ان کے آبائی علاقوں تک پہنچایا جا سکے۔
ترجمان پی آئی اے کا کہنا ہے کہ حج آپریشن 30 جون تک جاری رہے گا اور اس دوران ہزاروں پاکستانی حاجیوں کو مرحلہ وار وطن واپس لایا جائے گا۔
