پاکستان نے بھارت میں ایشین ہاکی چیمپئنز ٹرافی کھیلنے سے انکار کر دیا، پاکستان ہاکی فیڈریشن نے بھارت میں شیڈول ایشین چیمپئنز ٹرافی 2026 کے انعقاد پر گہرے تحفظات کا اظہار کرتے ہوئے ایشین ہاکی فیڈریشن کو ٹورنامنٹ کسی غیر جانب دار مقام پر منتقل کرنے کی باضابطہ درخواست کر دی ہے ۔
پی ایچ ایف کے صدر محی الدین احمد وانی نے اپنے بیان میں واضح کیا ہے کہ پاک بھارت موجودہ دوطرفہ حساس صورتحال اور سکیورٹی خدشات کے پیش نظر یہ مطالبہ کیا گیا ہے کہ یا تو پورا ٹورنامنٹ یا پھر پاکستان کے تمام میچز کسی محفوظ اور غیر جانب دار مقام پر کروائے جائیں ۔
محی الدین احمد وانی نے کہا کہ یہ فیصلہ قومی ٹیم کے کھلاڑیوں اور آفیشلز کے لیے ایک محفوظ، باوقار اور سازگار ماحول کی فراہمی کو یقینی بنانے کیلئے کیا گیا ہے ۔
انہوں نے اس بات کا اعادہ کیا کہ پاکستان ایشین چیمپئنز ٹرافی اور عالمی ہاکی کے فروغ کے لیے مکمل طور پر پرعزم ہے۔ انہوں نے اس عزم کا بھی اظہار کیا کہ پاکستان، بھارت سمیت تمام ایف آئی ایچ رکن ممالک کے خلاف میدان میں اترنے کے لیے تیار ہے اور کھیل کو سیاست سے پاک رکھنے کے اصول پر کاربند ہے ۔
ی ایچ ایف کے صدر نے امید ظاہر کی کہ ایشین ہاکی فیڈریشن قومی ٹیم کی ٹورنامنٹ میں بلا تعطل شرکت یقینی بنانے کے لیے غیر جانب دار مقام کی تجویز پر مثبت اور منصفانہ فیصلہ کرے گی ۔
واضح رہے کہ مینز ایشین چیمپئنز ٹرافی 2026 میں پاکستان سمیت چین، جاپان، ملائیشیا، جنوبی کوریا اور میزبان بھارت کی ٹیمیں مدِمقابل ہوں گی، جو 27 اکتوبر سے 5 نومبر تک بھارت کے شہروں جالندھر اور موہالی میں شیڈول ہے ۔
