اسلام آباد: وزیراعظم محمد شہباز شریف نے ہدایت کی ہے کہ پاکستان ریلوے کی طویل المدتی اور پائیدار ترقی کے لیے فریٹ سروس میں سرمایہ کاری اور میگا منصوبوں کی بروقت تکمیل کو پالیسی ترجیحات بنایا جائے۔
وزیراعظم محمد شہباز شریف کی زیر صدارت پاکستان ریلوے کے ترقیاتی منصوبوں کی پیش رفت پر جائزہ اجلاس میں ریلوے کے جاری منصوبوں اور اصلاحاتی اقدامات پر تفصیلی غور کیا گیا۔
اجلاس سے خطاب کرتے ہوئے وزیراعظم نے کہا کہ پاکستان ریلوے نے مسافروں کی سہولت اور ریلوے سٹیشنز کی بہتری کے لیے قابل ستائش کام کیا ہے۔
انہوں نے کہا کہ عالمی معیار کی فریٹ سروس سے صنعتی مصنوعات کی ترسیل میں آسانی پیدا ہوگی اور ریلوے کی سالانہ آمدن میں بھی نمایاں اضافہ ممکن ہوگا۔
وزیراعظم نے ہدایت کی کہ ریلوے کے جاری میگا منصوبوں میں مالی اور ادارہ جاتی انتظامات کی پیشگی منظوری کو یقینی بنایا جائے تاکہ منصوبوں کی تکمیل میں غیر ضروری تعطل اور تاخیر سے بچا جا سکے۔
انہوں نے کہا کہ پاکستان ریلوے کے میگا منصوبوں خصوصاً ایم ایل-1، ایم ایل-3 اور تھر کول ریل منصوبے کی جلد تکمیل کے لیے وفاقی اور صوبائی حکومتیں باہمی تعاون سے کام کریں۔
اجلاس میں وفاقی وزیر برائے ریلوے محمد حنیف عباسی اور سیکرٹری ریلوے نے مختلف اقدامات اور ترقیاتی منصوبوں کی پیش رفت پر بریفنگ دی۔
بریفنگ میں بتایا گیا کہ فریٹ سروس میں اصلاحاتی اقدامات کی بدولت رواں سال جون تک 40 ارب روپے تک کی تاریخی آمدن متوقع ہے۔
