پاکستان اسٹاک ایکس چینج 70 ہزار کےپوائنٹس کی حد کو برقرار نہ رکھ سکی

آج بھی پاکستان اسٹاک ایکس چینج (پی ایس ایکس) میں مندی کا رجحان برقرار ہے، 500 سے زائد پوائنٹس کمی سے انڈیکس 70 ہزار پوائنٹس کی حد برقرار نہ رکھ سکی۔اعلامیہ کے مطابق پاکستان اسٹاک مارکیٹ میں کے ایس ای-100انڈیکس میں 500 پوائنٹس کی کمی واقع ہوئی جس کی وجہ سے انڈیکس 69 ہزار 827 پوائنٹس پر آگیا ہے۔

واضح رہے کہ اسٹاک مارکیٹ میں اگرچہ گزشتہ روز ٹریڈنگ کے دوران انڈیکس 70700پوائنٹس کی بلند سطح عبور کر گیا تھا تاہم کاروبار میں پرافٹ ٹیکنگ کے لیے فروخت کے دباﺅ سے تیزی فوراً مندی میں تبدیل ہو گئی اور کاروباری سرگرمیاں ماند پڑ گئیں ہیں۔اسٹاک ماہرین کے مطابق عالمی مالیاتی ادارہ (آئی ایم ایف) کی کڑی شرائط کے خدشات کے پیش نظرنئے ٹیکس بجٹ میں لگانے کی قیاس آرائیوں اور معاشی بہتری کے اثرات فوری ظاہر نہ ہونے پر قلیل المدتی فروخت سے مارکیٹ دباﺅ کا شکار ہوئی۔