ٹی ٹوئنٹی ورلڈ کپ میں کرکٹ دنیا کے دو روایتی حریف پاکستان اور بھارت آج ایک سنسنی خیز مقابلے میں آمنے سامنے ہوں گے۔ میچ کولمبو کرکٹ اسٹیڈیم میں شام ساڑھے چھ بجے شروع ہوگا، جہاں شائقین کو ایک دلچسپ اور اعصاب شکن مقابلے کی توقع ہے۔
گرین شرٹس بھارتی سورماؤں کا مقابلہ کرنے کے لیے مکمل طور پر تیار ہیں۔ قومی کھلاڑیوں نے مقامی کنڈیشنز میں بھرپور پریکٹس کی ہے اور بالنگ، بیٹنگ اور فیلڈنگ پر خصوصی توجہ دی ہے تاکہ اہم میچ میں بہترین کارکردگی دکھائی جا سکے۔
دوسری جانب میچ سے قبل بھارتی ٹیم کو بڑا دھچکا لگا ہے۔ اوپنر ابھشیک شرما کی شرکت تاحال غیر یقینی ہے، جبکہ بھارتی ذرائع کے مطابق ان کی فٹنس سے متعلق حتمی فیصلہ میچ سے قبل کیا جائے گا۔
میچ دیکھنے کے لیے ہزاروں پاکستانی اور بھارتی شائقین کولمبو پہنچ چکے ہیں۔ ٹکٹ پہلے ہی فروخت ہو چکے ہیں جبکہ ہوٹلوں میں کمروں کی شدید قلت پیدا ہو گئی ہے اور کرایے بھی آسمان سے باتیں کر رہے ہیں۔ ذرائع کے مطابق چیئرمین پی سی بی محسن نقوی بھی میچ دیکھنے کے لیے سری لنکا جا سکتے ہیں۔
محکمہ موسمیات نے خبردار کیا ہے کہ کولمبو میں آئندہ تین روز کے دوران کہیں تیز اور کہیں ہلکی بارش کا امکان ہے، جس سے پاک بھارت ٹاکرا متاثر ہونے کا خدشہ ظاہر کیا جا رہا ہے۔ اگر میچ منسوخ ہوا تو دونوں ٹیموں کو ایک، ایک پوائنٹ دے دیا جائے گا۔
قومی ٹیم کے کپتان بابر اعظم نے میچ سے قبل اپنے بیان میں کہا کہ پاک بھارت مقابلے کے دوران شائقین کی توقعات حد سے زیادہ ہوتی ہیں، اس لیے کھلاڑی میدان کے باہر کی باتوں پر توجہ نہ دیں اور مکمل طور پر پرسکون رہتے ہوئے اپنی کارکردگی پر فوکس کریں۔
