صوبائی ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا میں 19 سے 23 جولائی تک شدید بارشوں، تیز ہواؤں اور گرج چمک کے پیش نظر الرٹ جاری کر دیا ہے۔
پی ڈی ایم اے کے مطابق صوبے کے بیشتر اضلاع میں موسلادھار بارشوں کا امکان ہے، جبکہ چترال، دیر، سوات اور کوہستان سمیت پہاڑی علاقوں میں لینڈ سلائیڈنگ کا خدشہ بھی ظاہر کیا گیا ہے۔
ترجمان پی ڈی ایم اے کا کہنا ہے کہ پہاڑی ندی نالوں میں طغیانی اور فلش فلڈ کا خطرہ موجود ہے، جبکہ پشاور، مردان، نوشہرہ اور ایبٹ آباد میں اربن فلڈنگ کا بھی امکان ہے۔
پی ڈی ایم اے نے شہریوں، خصوصاً سیاحوں سے اپیل کی ہے کہ غیر ضروری سفر اور ندی نالوں کے قریب جانے سے گریز کریں۔ تیز ہواؤں اور آسمانی بجلی کے باعث کمزور مکانات، بجلی کے کھمبوں، بل بورڈز اور فصلوں کو نقصان پہنچنے کا خدشہ بھی ظاہر کیا گیا ہے۔
ادارے نے ضلعی انتظامیہ اور متعلقہ اداروں کو ہائی الرٹ رہنے کی ہدایت کرتے ہوئے کسانوں کو فصلوں اور مویشیوں کے تحفظ کے لیے احتیاطی تدابیر اختیار کرنے کا مشورہ دیا ہے۔ عوام کو ہدایت کی گئی ہے کہ بارش کے دوران زیر آب سڑکوں، پلوں اور برساتی نالوں کو عبور کرنے سے گریز کریں۔
