پاکستان تحریک انصاف پشاور کے کارکنان نے بانی چیئرمین کی ایک آنکھ کی بینائی متاثر ہونے اور صحت کی سہولیات فراہم نہ کیے جانے کے خلاف شدید احتجاج کیا ہے۔
پشاور میں پی ٹی آئی کے ضلعی صدر عرفان سلیم اور دیگر عہدیداران کی قیادت میں موٹروے ٹول پلازہ پر احتجاج کیا گیا، جس کے باعث موٹروے کو ہر قسم کی ٹریفک کے لیے بند کر دیا گیا۔ مظاہرین نے ٹول پلازہ پر دھرنا دے کر مرکزی شاہراہ کو بلاک کر دیا، جس کے نتیجے میں پشاور سے دیگر اضلاع اور صوبوں کو جانے والی گاڑیاں رک گئیں جبکہ دوسرے صوبوں سے پشاور آنے والی ٹریفک بھی متاثر ہوئی۔
احتجاج کے باعث شہریوں کو شدید مشکلات کا سامنا کرنا پڑا اور بیشتر افراد نے متبادل راستے کے طور پر جی ٹی روڈ کا استعمال کیا۔ مظاہرین کا مطالبہ تھا کہ بانی چیئرمین کے ساتھ اڈیالہ جیل میں مبینہ ناروا سلوک بند کیا جائے اور انہیں فوری طور پر مکمل طبی سہولیات فراہم کی جائیں۔
مظاہرین کا کہنا تھا کہ جب تک ان کے مطالبات تسلیم نہیں کیے جاتے، احتجاج کا سلسلہ جاری رکھا جائے گا۔ دوسری جانب انتظامیہ کی جانب سے صورتحال پر نظر رکھی جا رہی ہے تاکہ امن و امان برقرار رکھا جا سکے۔
