نیشنل ڈیزاسٹر مینجمنٹ اتھارٹی نے گزشتہ دو ماہ کے دوران مون سون کی بارشوں اور سیلاب کے دوران ہونے والے جانی نقصانات کی تفصیل جاری کردی، این ڈی ایم اے کے مطابق 26 جون سے 28 اگست تک مختلف حادثات کے دوران 819 افراد جاں بحق اور ایک ہزار 111 افراد زخمی ہوئے ۔
اسلام آباد: این ڈی ایم اے کی جانب سے جاری بیان کے مطابق مون سون سیزن کے دوران خیبرپختونخوا میں سب سے زیادہ جانی نقصان ہوا، جہاں 479 افراد جاں بحق ہوئے،اس دوران پنجاب میں 182، سندھ میں57 اور بلوچستان میں 24 افراد جاں بحق ہوئے ۔
این ڈی ایم اے کی رپورٹ کے مطابق مون سون کے دوران گلگت بلتستان میں 41 اور آزاد کشمیر میں 28 جبکہ اسلام آباد میں 8 افراد جاں بحق ہوچکے ہیں ۔
رپورٹ میں مزید بتایا گیا ہے کہ گزشتہ 24 گھنٹے میں 14 افراد جاں بحق اور 4 زخمی ہوئے، ان میں سے 13 افراد کا تعلق پنجاب اور ایک کا کشمیر سے ہے ۔
این ڈی ایم اے کے مطابق زخمی ہونے والوں میں سے3 کا تعلق پنجاب اور ایک کا خیبرپختونخوا سے ہے ۔
رپورٹ میں املاک کے نقصان کے حوالے سے بتایا گیا ہے کہ مون سون کے دوران گزشتہ 24 گھنٹے میں 606 گھروں کو نقصان پہنچا، جبکہ 505 مویشی ہلاک ہوئے ۔
