خیبرپختونخوا کے اضلاع شانگلہ اور سوات میں گھروں کی چھتیں گرنے کے دو الگ الگ افسوسناک واقعات میں مجموعی طور پر آٹھ بچے جاں بحق جبکہ متعدد افراد زخمی ہوگئے۔
شانگلہ کی تحصیل الپوری کے علاقے باسی میں کچے مکان کی چھت گرنے سے پانچ بچیاں اور ایک بچہ جاں بحق جبکہ ایک بچی زخمی ہوگئی۔ پولیس کے مطابق مقامی افراد نے ملبے تلے دبے تمام بچوں کو نکال لیا۔ جاں بحق بچے یتیم تھے اور ان کے والد کا کچھ عرصہ قبل انتقال ہوچکا تھا، جس کے باعث علاقے میں سوگ کی فضا قائم ہے۔
دوسری جانب سوات کے علاقے چارباغ گنڈھیرئی میں ایک گھر منہدم ہونے سے دو بچیاں جاں بحق جبکہ ان کی والدہ اور ایک بچی زخمی ہوگئیں۔ مقامی افراد نے ملبے تلے دبے افراد کو نکالا جبکہ زخمیوں کو مزید علاج کے لیے ٹی ایچ کیو اسپتال منگلور منتقل کر دیا گیا۔
