اسلام آباد: وزیراعظم محمد شہباز شریف سے پاکستان میں عوامی جمہوریہ چین کے سفیر جیانگ زائی ڈونگ نے وزیراعظم ہاؤس میں ملاقات کی۔
ملاقات میں دوطرفہ تعلقات، سی پیک 2.0، اقتصادی تعاون اور علاقائی صورتحال سمیت اہم امور پر تفصیلی گفتگو کی گئی۔
ملاقات میں وزیراعظم کے مشیر ڈاکٹر سید توقیر شاہ، معاونِ خصوصی سید طارق فاطمی اور سیکرٹری خارجہ سفیر آمنہ بلوچ بھی شریک تھیں۔
وزیراعظم نے چینی صدر شی جن پنگ اور چینی وزیراعظم لی چیانگ کے لیے نیک تمناؤں کا اظہار کرتے ہوئے اپنے حالیہ دورۂ چین کے دوران چینی قیادت کے ساتھ ہونے والی مفید اور نتیجہ خیز ملاقاتوں کا ذکر کیا۔
انہوں نے پاکستان اور چین کے درمیان ہر موسم کی اسٹریٹجک تعاون پر مبنی شراکت داری کو مزید مضبوط بنانے کے عزم کا اعادہ کیا اور دورۂ چین کے دوران طے پانے والے فیصلوں پر فوری اور مؤثر عملدرآمد کی ضرورت پر زور دیا۔
وزیراعظم نے بالخصوص چین پاکستان اقتصادی راہداری (سی پیک) کے دوسرے مرحلے، سی پیک 2.0، کے تحت زراعت، انفارمیشن ٹیکنالوجی، صنعتی ترقی، خصوصی اقتصادی زونز اور معدنیات و کان کنی کے شعبوں میں تعاون کو وسعت دینے کی اہمیت اجاگر کی۔
انہوں نے ہانگژو میں منعقدہ بزنس ٹو بزنس سرمایہ کاری کانفرنس کے دوران پاکستانی اور چینی کمپنیوں کے درمیان طے پانے والی مفاہمتی یادداشتوں پر بروقت عملدرآمد کو یقینی بنانے کی ضرورت پر بھی زور دیا تاکہ دونوں ممالک کے درمیان اقتصادی تعاون کے ثمرات جلد حاصل کیے جا سکیں۔
وزیراعظم شہباز شریف نے اپنے دورۂ چین کو کامیاب بنانے میں چینی سفیر کی خدمات کو سراہتے ہوئے کہا کہ دونوں ممالک کے متعلقہ اداروں اور حکام کو قیادت کے طے کردہ فیصلوں کو عملی جامہ پہنانے کے لیے باہمی تعاون مزید فروغ دینا ہوگا۔
ملاقات میں قراقرم ہائی وے ری الائنمنٹ منصوبے پر پیش رفت، سکیورٹی، انسداد دہشت گردی اور دفاعی تعاون کے فروغ کے علاوہ پاکستان کے لیے اقتصادی اور مالی معاونت سے متعلق امور پر بھی تبادلہ خیال کیا گیا۔ اس کے ساتھ ساتھ خطے کی بدلتی صورتحال اور اہم بین الاقوامی پیش رفت بھی زیرِ بحث آئی۔
چینی سفیر جیانگ زائی ڈونگ نے اس عزم کا اظہار کیا کہ چین پاکستان کے ساتھ اپنی فولادی اور لازوال برادرانہ دوستی کو مزید مستحکم بنانے اور تمام شعبوں میں دوطرفہ تعاون کو وسعت دینے کے لیے پُرعزم ہے۔
جیانگ زائی ڈونگ نے وزیراعظم کا شکریہ ادا کرتے ہوئے انہیں عیدالاضحیٰ کی مبارکباد دی اور 23 تا 26 مئی 2026 کے کامیاب دورۂ چین پر مبارکباد پیش کی۔
