گوادر کے علاقے سربندر میں کوارٹر میں سوئے ہوئے7 افراد کو فائرنگ کر کے قتل کر دیا گیا۔ ساتوں افراد کا تعلق پنجاب کے ضلع خانیوال سے ہے۔ پولیس کے مطابق نامعلوم افراد نے گوادر فش ہاربر کے قریب رہائشی کوارٹر پر فائرنگ کی جس کے نتیجے میں 7 افراد جاں بحق اور ایک زخمی ہو گیا۔
پولیس کا کہنا ہے کہ شہید اور زخمی افراد سربندر میں حجام کی دکان میں کام کرتے تھے، لاشوں اور زخمی شخص کو گوادر اسپتال منتقل کر دیا گیا ہے۔ حکومت بلوچستان کی جانب سے جاری بیان میں کہا گیا ہے کہ گوادر میں مزدوروں کا قتل کھلی دہشت گردی ہے۔ وزیر داخلہ بلوچستان ضیا لانگو نے گوادرمیں افسوسناک واقعےکی تحقیقات کاحکم دیتے ہوئے کہا کہ مزدوروں کا قتل بزدلانہ اقدام ہے، دہشتگردوں سے سختی سے نمٹیں گے۔
یاد رہے کہ کچھ عرصہ قبل بھی گوادر ائیر پورٹ پر شرپسندوں نے حملے کی کوشش کی تھی جسے سکیورٹی اہلکاروں نے ناکام بنا دیا تھا۔
