الیکشن کمیشن آف پاکستان نے خیبرپختونخوا میں بلدیاتی انتخابات سے متعلق محفوظ فيصلہ سناتے ہوئے صوبے ميں فوری طور پر مقامی انتخابات کرانے کا حکم دے ديا ،اليکشن کميشن نے صوبے میں انتخابات کا شیڈول جاری کرنے کی ہدایت بھی کردی ۔
اسلام آباد: چیف الیکشن کمشنر سکندر سلطان راجہ کی سربراہی میں الیکشن کمیشن کے پانچ رکنی بینچ نے بلدیاتی انتخابات سے متعلق محفوظ کیا گیا فیصلہ سنایا ۔
الیکشن کمیشن نے خیبرپختونخوا میں بلدیاتی انتخابات کرانے کا حکم دے دیا، جبکہ متعلقہ ونگ کو انتخابی شیڈول پیش کرنے کی ہدایت بھی کردی گئی ہے ۔
الیکشن کمیشن کے حکم نامے کے مطابق جن اضلاع میں حلقہ بندیاں مکمل ہوچکی ہیں، وہاں بلدیاتی انتخابات کرائے جائیں گے، جبکہ جن اضلاع میں حلقہ بندیاں نہیں ہوئیں، وہاں حلقہ بندیوں کا شیڈول جاری کرنے کی ہدایت کی گئی ہے ۔
الیکشن کمیشن کے حکم نامے میں مزید کہا گیا ہے کہ خیبرپختونخوا کے 12 قبائلی اضلاع میں فی الحال حلقہ بندیاں اور بلدیاتی انتخابات نہیں ہوں گے، اس کو دوسرے مرحلے میں کرایا جائے گا ۔
