پاکستان کے معروف فنکاروں ساجد حسن نے کہا ہے کہ 9 مئی کے پرتشدد واقعات ہولناک سانحہ ہے جس کی جتنی بھی مذمت کی جائے کم ہے۔
اعلامیہ کے مطابق پاکستان کے معروف فنکار برادری ساجد حسن نے سانحہ 9 مئی کی مذمت کرتے ہوئے اس واقعے میں ملوث ذمہ داران کو کڑی سے کڑی سزا دینے کا مطالبہ کیا ہے۔ اداکار ساجد حسن کے مطابق 9 مئی کے واقعات کو انتہائی تشویش سے دیکھتا ہوں، شہدا کی یادگاروں کی بے حرمتی کسی بھی صورت میں قابل قبول نہیں ہے، سب سے پہلے پاکستان ہے،باقی سب کچھ بعد میں آتا ہے، اگر پاکستان ہے تو ہم ہیں۔اس لئے عدالتوں کو چاہیے کہ وہ شہدا کی یادگاروں کی بے حرمتی کرنے والوں کے خلاف سخت ایکشن لیں۔
اسی طرح گلوکارہ راحت بانو نے کہا کہ شہدا کی تصاویر اور یادگاروں کو جلایا جانا انتہائی قابل مذمت ہے، ہم اپنے شہدا کی قدر کرتے ہیں جو اس پاک سرزمین پر قربان ہوئے۔پاکستان کے معروف اداکار اعجاز راہی نے کہا ہے کہ ہم جو آزاد ہیں وہ صرف شہدا کی قربانیوں کی وجہ سے ہیں اور اس لئے ان کی تکریم ہم پر لازم ہے۔ اداکار محسن گیلانی نے کہا کہ ہمیں اپنے شہداء کی قدر ہے جو اس پاک سرزمین پر قربان ہوئے ہیں، ہمارے جوان اور شہداء جو ملک میں دہشت گردی کے خلاف لڑ رہے ہیں ہمیں ان کی قدر کرنی چاہیے۔
