ضلع باجوڑ کی تحصیل ماموند کے علاقے ترخو خورگئی میں نامعلوم افراد کی فائرنگ کے نتیجے میں ایک ایف سی اہلکار سمیت دو افراد جاں بحق جبکہ ایک شخص زخمی ہوگیا۔
پولیس کے مطابق فائرنگ کے واقعے میں تین افراد زخمی ہوئے تھے جنہیں فوری طور پر اسپتال منتقل کیا گیا، تاہم زخمیوں میں شامل عام شہری عمر اور ایف سی اہلکار اجمل زخموں کی تاب نہ لاتے ہوئے دم توڑ گئے۔ واقعے کے بعد پولیس نے تحقیقات کا آغاز کر دیا ہے جبکہ علاقے میں سرچ آپریشن بھی کیا گیا۔
دوسری جانب باجوڑ کے خار بازار کے مرکزی چوک میں دن دہاڑے نامعلوم مسلح افراد نے ایک شخص کو فائرنگ کرکے قتل کر دیا۔ واقعے کے بعد بازار میں خوف و ہراس پھیل گیا۔
ادھر خار بازار کے تاجروں نے فائرنگ کے واقعے اور امن و امان کی صورتحال کے خلاف مرکزی چوک میں احتجاجی مظاہرہ کیا۔ مظاہرین نے مطالبہ کیا کہ ملزمان کو فوری گرفتار کرکے علاقے میں عوام اور تاجروں کے تحفظ کو یقینی بنایا جائے۔
