امریکی صدر ڈونلڈ ٹرمپ نے پاکستان کے ساتھ تجارتی معاہدے طے پانے کا اعلان کرتے ہوئے کہا ہے کہ میں نے کئی ممالک کے رہنماؤں سے بات کی ہے جن میں سے ہر کوئی چاہتا ہے کہ امریکا انتہائی خوش ہو ۔
امریکی صدر ڈونلڈ ٹرمپ نے اپنے ’ٹروتھ سوشل‘ پر پوسٹ کرتے ہوئے بتایا کہ ’ہم آج وائٹ ہاؤس میں تجارتی معاہدوں پر کام کرتے ہوئے بےحد مصروف ہیں، میں نے کئی ممالک کے رہنماؤں سے بات کی ہے جن میں سے ہر کوئی چاہتا ہے کہ امریکا انتہائی خوش ہو‘ ۔
انہوں نے کہا کہ ’آج سہ پہر میری جنوبی کوریا کے تجارتی وفد سے ملاقات ہوگی، اس وقت جنوبی کوریا پر 25 فیصد محصولات لاگو ہے، لیکن اُن کے پاس ان ٹیرف کو کم کرنے کی پیشکش ہے، مجھے یہ سننے میں دلچسپی ہے کہ وہ پیشکش کیا ہے‘۔
صدر ٹرمپ نے بتایا کہ ’ہم نے ابھی پاکستان کے ساتھ ایک معاہدہ طے کیا ہے، جس کے تحت پاکستان اور امریکہ مل کر پاکستان میں تیل کے وسیع ذخائر کو ترقی دیں گے، ہم اس وقت اُس آئل کمپنی کا انتخاب کرنے کے عمل میں ہیں جو اس شراکت داری کی قیادت کرے گی‘۔
