اسلام آباد: (تحسین اللہ تاثیر) موسمیاتی تبدیلیوں کے نتیجے میں دنیا کا درجہ حرارت بڑھتا جا رہا ہے، جس سے لاکھوں زندگیوں اور ذریعہ معاش کو خطرہ لاحق ہے۔کسی ایک علاقے کی آب و ہوا اُس کے کئی سالوں کے موسم کا اوسط ہوتی ہےاور اس اوسط میں تبدیلی کو موسمیاتی تبدیلی کہتے ہیں۔
موسمیاتی تبدیلی سے مراد زمین پر درجہ حرارت، بارش، ہوا کے نمونوں اور دیگر ماحولیاتی عوامل میں طویل مدتی تبدیلیاں ہیں۔ یہ تبدیلیاں بنیادی طور پر انسانی سرگرمیوں سے ہوتی ہیں جو ماحول میں گرین ہاؤس گیسز (GHGs) جیسے کاربن ڈائی آکسائیڈ (CO2)، میتھین (CH4)اور نائٹرس آکسائیڈ (N2O) کو خارج کرتی ہیں۔
موسمیاتی تبدیلی کی وجوہات
گرین ہاؤس گیسوں کا اخراج: توانائی اور نقل و حمل کے لیے ایندھن یعنی کوئلہ، تیل، اور قدرتی گیس کا جلانا CO2 کے اخراج میں سب سے بڑا معاون ہے۔
جنگلات کی کٹائی: جنگلات کو کاٹنا زمین کی کاربن ڈائی اکسائیڈ کو جذب کرنے کی صلاحیت کو کم کرتا ہے۔
صنعتی عمل: مینوفیکچرنگ، سیمنٹ کی پیداوار، اور بعض کیمیائی عمل گرین ہاؤس گیسز (GHGs) جاری کرتے ہیں۔
موسمیاتی تبدیلی کے اثرات
موسمیاتی تبدیلی انسانی صحت کے لیے سب سے بڑے خطرات میں سے ایک کے طور پر جانی جاتی ہے، یہاں تک کہ اسے کچھ وائرسز سے بھی زیادہ خطرناک مانا جاتا ہے۔سائنسدانوں نے کچھ بنیادی اثرات کی نشاندہی کی ہے جو موسمیاتی تبدیلیوں کی وجہ سے پیدا ہوئے ہیں۔بڑھتا ہوا درجہ حرارت: عالمی اوسط درجہ حرارت میں مسلسل اضافہ ہو رہا ہے، جس کی وجہ سے شدید گرمی کی لہریں اٹھ رہی ہیں۔
بدلتے ہوئے بارش کے پیٹرن: کچھ علاقوں کو زیادہ بار بار اور شدید خشک سالی کا سامنا کرنا پڑتا ہے، جبکہ دیگر کو بارش اور سیلاب کا سامنا کرنا پڑ سکتا ہے۔سطح سمندر میں اضافہ: برف کے پگھلنے سے سمندری پانی کی تھرمل توسیع بڑھتی ہے، جس کے نتیجے میں سمندر کی سطح میں اضافہ ہوتا ہے اور یہ اضافہ ساحلی علاقوں کے لوگوں کے لیے خطرہ پیدا کرتا ہے۔انتہائی موسمی واقعات:موسمیاتی تبدیلی سے بار بار آنے والے اور شدید سمندری طوفان، سائیکلون اورجنگلات میں آگ کے واقعات رونما ہوسکتے ہیں۔
ماحولیاتی نظام پر اثر: آب و ہوا میں تبدیلی ماحولیاتی نظام کو متاثر کرتی ہے، زیادہ گرمی کی وجہ سے جنگلی جانور ایک جگہ سے دوسری جگہ منقتل ہوتے ہیں، اسی طرح پودوں کی بقا کو بھی متاثر کرتی ہے۔
صحت کے خطرات: گرمی سے متعلق بیماریاں، فضائی آلودگی سے سانس کے مسائل، اور متعدی بیماریوں کا پھیلاؤ موسمیاتی تبدیلیوں سے بڑھتا ہے۔
موسمیاتی تبدیلی کا مقابلہ کیسے کرے؟
موسمیاتی تبدیلیوں کو کم کرنے کے لیے پالیسیوں، تکنیکی ترقی اور طرز زندگی میں تبدیلیوں کے ذریعے گرین ہاؤس گیسوں کے اخراج کو کم کرنے کی ضرورت ہے۔ اس میں قابل تجدید توانائی کے ذرائع کی طرف منتقلی، توانائی کی کارکردگی کو بہتر بنانا، جنگلات کی بحالی اور پائیدار زمین کے استعمال کے طریقے شامل ہیں۔اسطرح لچکدار انفراسٹرکچر کی تعمیر، شدید موسمی واقعات کے لیے ابتدائی انتباہی نظام تیار کرنا اور کمیونٹی پر مبنی موافقت کی حکمت عملیوں کو فروغ دینا شامل ہے۔
