سابق امریکی صدر ڈونلڈ ٹرمپ کو جعلسازی کے کیس میں مجرم قرار دیا گیا ہے، جبکہٹرمپ نے اس فیصلے کو مضحکہ خیز قرار دیا ہے۔
ڈونلڈ ٹرمپ کو سزا کاروباری ریکارڈ میں جعل سازی کرنے کی وجہ سے نیویارک کی جیوری نے سنائی، 11 جولائی کو عدالتی حکم کے مطابق ڈونلڈ ٹرمپ کی سزا کا باقاعدہ اعلان کیا جائے گا۔سابق امریکی صدر ڈونلڈ ٹرمپ پر فحش فلموں کی اداکارہ اسٹارمی ڈینئلز کو 1 لاکھ 30 ہزار ڈالر کی ادائیگی سے متعلق 34 الزامات عائد کئے گئے تھے، جس پر جیوری نے تمام الزامات کو درست قرار دے دیا ہے۔
ڈونلڈ ٹرمپ پر یہ الزام عائد تھا کہ ان کے اسٹارمی ڈینئلز کے ساتھ جنسی تعلقات تھے اور اس کو چھپانے کیلئے 2016 کے صدارتی انتخابات کے موقع پر اسٹارمی ڈینئلز کو رقم بھی دی گئی تھی، جس کی وجہ سے ڈونلڈ ٹرمپ الیکشن جیت گئے تھے۔واضح رہے کہ پہلی مرتبہ امریکی تاریخ میں کسی سابق امریکی صدر کو جرم ثابت ہونے پر سزا سنائی گئی ہے۔
دوسری طرف ڈونلڈ ٹرمپ نے فیصلے کو مضحکہ خیز قرار دے دیا ہے اور ساتھ ہی کہا ہے کہ میں بالکل بے قصور ہوں، یہ مقدمہ میری توہین کرنے کے لئے کیا گیا ہے، ابھی معاملہ ختم نہیں ہوا ہے۔اپنے ردعمل میں ٹرمپ کا کہنا تھا کہ ہم آخر حد تک لڑیں گے، یہ آئین اور قانون کیلئے جنگ ہے طویل جنگ ہوگی۔جبکہ جیوری کی طرف سے سزا سنائے جانے کے بعد سابق امریکی صدر ڈونلڈ ٹرمپ نے صحافیوں کے کسی بھی سوال کا جواب دینے سے گریز کیا ہے۔
