مردان میں پولیس موبائل پر فائرنگ، 1 اہلکار شہید
ضلع مردان میں نامعلوم افراد نے پولیس موبائل پر فائرنگ کی جس کے نتیجے ایک اہلکار شہید جبکہ راہ گیر بچی سمیت دو اہلکار زخمی ہوگئے۔ مردان میں گشت کے دوران نامعلوم افراد نے پولیس موبائل پر اندھا دھند فائرنگ کی، جس کے نتیجے میں تین پولیس اہلکار اور ایک راہ گیر بچی زخمی ہوئی۔
موبائل میں موجود دیگر اہلکاروں نے جوابی فائرنگ کی جس کے نتیجے میں ایک حملہ آور بھی مارا گیا۔ واقعے کے بعد پولیس نے مقام کو سیل کر کے شواہد بھی اکھٹے کیے۔
فائرنگ کے بعد جائے وقوعہ پر ایمبولینس طلب کر کے زخمیوں کو اسپتال منتقل کیا گیا، جہاں ڈاکٹرز نے ایک اہلکار کی شہادت کی تصدیق کی۔ ڈاکٹرز نے دیگر زخمی ہونے والے دو اہلکاروں اور بچی کو اسپتال میں داخل کر کے علاج شروع کردیا۔ رپورٹ کے مطابق اہلکاروں اور بچی کی حالت خطرے سے باہر ہے۔
پولیس نے حملہ آور کی لاش کو بھی قبضے میں لے کر ضابطے کی کارروائی کے لیے اسپتال منتقل کیا۔ واقعے کے بعد پولیس کی مزید نفری کو طلب کر کے حملہ آور اور ساتھیوں کی تلاش کے لیے سرچ آپریشن کیا جارہا ہے۔