اسلام آباد: 14 فروری کو آرمی چیف اور وفاقی و صوبائی حکومت کی اہم شخصیات "گرین پاکستان انیشیٹو” (جی پی آئی) کے مختلف زرعی منصوبوں کا دورہ کریں گے۔ یہ دورہ زرعی شعبے کی ترقی میں ایک اہم سنگ میل ثابت ہو گا، جس میں جدید زرعی ٹیکنالوجیز اور مشینری کی نمائش بھی شامل ہے۔
اس موقع پر جی پی آئی کے تحت جاری زرعی منصوبوں اور سہولیات کا تفصیلی جائزہ لیا جائے گا۔ دورے کے دوران "سمارٹ ایگری فارم”، "گرین ایگری مال” اور "تحقیقی سہولت مراکز” کا افتتاح بھی کیا جائے گا۔ ان منصوبوں کا مقصد زرعی پیداوار میں اضافے کے ساتھ ساتھ کسانوں کو جدید تکنیکوں سے روشناس کرانا ہے۔
حکومتی شخصیات ماڈل فارمز کا بھی دورہ کریں گی، جو پیرووال اور مظفرگڑھ میں قائم کیے گئے ہیں۔ یہ ماڈل فارمز کسانوں کو جدید زرعی طریقوں سے آگاہ کرنے میں مدد دیں گے اور زرعی شعبے میں ٹیکنالوجی کے مؤثر استعمال کو فروغ دیں گے۔
جی پی آئی کی جانب سے کارپوریٹ فارمنگ میں استعمال ہونے والی جدید زرعی مشینری اور ٹیکنالوجیز کی نمائش بھی کی جائے گی، جس کا مقصد زرعی پیداوار میں بہتری لانا اور کسانوں کو سہولت فراہم کرنا ہے۔
حکومتی اور عسکری قیادت کا یہ دورہ ملک میں زرعی ترقیاتی منصوبوں کو مزید فروغ دے گا، جو ملکی معیشت کے استحکام میں بھی معاون ثابت ہوں گے۔ ایس آئی ایف سی اور جی پی آئی کی مشترکہ کاوشیں زرعی شعبے کو جدید خطوط پر استوار کرنے میں کلیدی کردار ادا کر رہی ہیں۔
