-
پشاور (حسن علی شاہ) – ماہ رمضان میں ناجائز منافع خوروں نے اپنی حرص اور حرام خوری کی روایات کو برقرار رکھتے ہوئے امسال بھی عوام کو مہنگائی کے طوفان سے دوچار کردیا ہے۔ روزمرہ ضروری اشیاء جیسے سبزی، آٹا، دالیں، فروٹ، گھی، کوکنگ آئل، چاول، بیسن، مصالحہ جات اور گوشت سرکاری نرخ نامے کی کھلم کھلا خلاف ورزی کرتے ہوئے من مانی قیمتوں پر فروخت کی جا رہی ہیں۔
دودھ، دہی اور گوشت قیمہ بھی نہ صرف زیادہ داموں میں فروخت ہو رہا ہے بلکہ کم وزن میں دیا جا رہا ہے۔ ضلعی انتظامیہ کے برائے نام چھاپے اور جرمانے بھی ناجائز منافع خوروں کی حوصلہ شکنی میں ناکام رہے ہیں۔
پشاور کی عوام نے اس صورتحال پر شدید ردعمل کا اظہار کرتے ہوئے کمشنر اور ڈپٹی کمشنر سے فوری اور سخت اقدامات کرنے کا پرزور مطالبہ کیا ہے تاکہ رمضان کے اس بابرکت مہینے میں قیمتوں کو قابو میں لایا جا سکے اور عام شہری ریلیف حاصل کر سکیں۔
