گزشتہ روز مسلم لیگ (ن) میں شمولیت اختیار کرنے والی عوامی نیشنل پارٹی کی سابق رہنما ثمر بلور نے قومی اسمبلی کے لیے خواتین کی 2 مخصوص خالی نشستوں کے لیے مسلم لیگ (ن) کی جانب سے کاغذات نامزدگی جمع کر ا دیئے ، دوسری جانب سابق رکن صوبائی اسمبلی جمشید مہمند کی اہلیہ نے بھی کاغذات نامزدگی جمع کرا دیئے ۔
پشاور میں الیکشن کمیشن کے دفتر کے باہر میڈیا سے گفتگو کرتے ہوئے ثمر بلور نے کہا کہ مسلم لیگ (ن) کے ساتھ بہت عرصہ سے بات چیت ہورہی تھی، یہ ایک رات کا فیصلہ نہیں تھا، بلکہ ایک سال سے بات چیت چل رہی تھی ۔
انہوں نے مزید کہا کہ اپنے شہر کے لیے کچھ کرنا چاہتی ہوں، جو لوگ پشاور پر مسلط کیے گئے، وہ لوٹ کھسوٹ میں مصروف ہیں ۔
ثمر بلور نے کہا کہ غلام احمد بلور ہمارے خاندان کے سربراہ ہیں، غلام احمد بلور نے عملی سیاست سے کنارہ کشی اختیار کی تو اس کے بعد ن لیگ میں شمولیت کا فیصلہ کیا ۔
ان کا مزید کہنا تھا کہ اے این پی اور اس کی قیادت میرے لیے قابل احترام ہیں، آج ہارون بلور کی برسی ہے، ہم اپنے شہدا کو دل میں لیے پھرتے ہیں ۔
ثمر بلور نے مزید کہا کہ خیبر پختونخوا حکومت کے نام پر سرکس چل رہا ہے، آئندہ انتخابات میں پشاور کے آبائی حلقے سے ہی (ن) لیگ کے ٹکٹ پر حصہ لوں گی ۔
