ایبٹ آباد: کمانڈر نیشنل اسٹریٹجک کمانڈ جنرل سید عامر رضا نے کہا ہے کہ پاکستان کی مسلح افواج ملک کے چپے چپے کے دفاع کے لیے ہمہ وقت تیار ہیں اور سرحد پار سے ہونے والی دراندازی کسی صورت برداشت نہیں کی جائے گی۔
پاکستان ملٹری اکیڈمی (پی ایم اے) کاکول میں پاسنگ آؤٹ پریڈ سے خطاب کرتے ہوئے جنرل سید عامر رضا نے کامیاب ہونے والے کیڈٹس اور ان کے والدین کو مبارک باد دی۔ انہوں نے کہا کہ کیڈٹس کے کندھوں پر ملک کی سلامتی، وقار اور دفاع کی بھاری ذمہ داری عائد ہوتی ہے، جسے انہیں بھرپور عزم اور پیشہ ورانہ صلاحیتوں کے ساتھ نبھانا ہوگا۔
انہوں نے نوجوان افسران پر زور دیا کہ وہ اپنی عملی زندگی میں پیش آنے والے چیلنجز کا بہادری سے مقابلہ کریں۔ ان کا کہنا تھا کہ دیانت داری، بہادری اور جرات مؤثر قیادت کے بنیادی اصول ہیں، جبکہ ملکی سلامتی کے تحفظ میں ہر افسر کا کردار اہم ہے۔
جنرل سید عامر رضا نے خواتین کیڈٹس کی شرکت کو باعثِ فخر قرار دیتے ہوئے کہا کہ افواجِ پاکستان نے مختلف شعبوں میں اپنی صلاحیتوں کا اظہار کیا ہے۔
خطے کی صورت حال پر گفتگو کرتے ہوئے کمانڈر نیشنل اسٹریٹجک کمانڈ نے کہا کہ حالیہ علاقائی کشیدگی کے دوران پاکستان نے عالمی سطح پر مثبت کردار ادا کیا، جبکہ کشیدگی میں کمی کے لیے پاکستان کی سفارتی کوششوں اور ثالثی کے کردار کو بھی عالمی سطح پر دیکھا گیا۔
انہوں نے کہا کہ افواجِ پاکستان ملکی دفاع کے لیے ہر وقت تیار ہیں اور ملک کے تحفظ کی خاطر سکیورٹی اہلکار اپنی جانوں کی قربانیاں دے رہے ہیں۔ انہوں نے واضح کیا کہ سرحد پار سے دراندازی کو قبول نہیں کیا جائے گا۔
فلسطین کی صورت حال کا ذکر کرتے ہوئے جنرل سید عامر رضا نے انسانی حقوق کی خلاف ورزیوں کے خاتمے کی ضرورت پر زور دیا۔ انہوں نے مسئلہ کشمیر کو بھی اقوام متحدہ کی سلامتی کونسل کی قراردادوں کے مطابق حل طلب معاملہ قرار دیا۔
