اسلام آباد – یومِ آزادی کے موقع پر شکر پڑیاں پریڈ گراؤنڈ میں شاندار نمائش کا اہتمام کیا گیا ہے، جہاں عوام کے لیے دفاعی سازوسامان کی نایاب جھلک پیش کی جائے گی۔
ملک بھر میں یومِ آزادی اور "معرکہ حق” کی فتح کی تیاریوں کا جوش عروج پر ہے۔ اس سلسلے میں 14 اگست کو شکر پڑیاں پریڈ گراؤنڈ صبح 10 بجے شہریوں کے لیے کھول دیا جائے گا۔
نمائش میں افواجِ پاکستان کی جانب سے "معرکہ حق” میں استعمال ہونے والے مختلف جنگی ہتھیار، لڑاکا طیارے، ٹینک اور دیگر فوجی سازوسامان شامل ہوں گے۔ توپیں، راکٹ لانچر وہیکلز، جنگی ساز و سامان بردار گاڑیاں اور بکتر بند گاڑیاں بھی عوام کی توجہ کا مرکز بنیں گی۔
اس کے ساتھ ساتھ "معرکہ حق” میں اہم کردار ادا کرنے والے جدید ریڈار سسٹمز بھی نمائش کا حصہ ہوں گے۔ پاک فضائیہ خصوصی فلائی پاسٹ پیش کرے گی جبکہ پیرا جمپنگ کا شاندار مظاہرہ بھی کیا جائے گا۔
شکر پڑیاں پریڈ گراؤنڈ میں مختلف اسٹالز، ثقافتی پروگرامز اور فوجی بینڈز بھی ہوں گے، جو ملی نغموں کی دھنوں سے عوام کے جذبہ حب الوطنی کو جلا بخشیں گے۔ اس نمائش کا مقصد ہر شہری کو اس تاریخی دن کی خوشیوں میں شریک کرنا اور قومی فخر کو اجاگر کرنا ہے۔
