وفاقی وزیر داخلہ محسن نقوی نے تبلیغی مرکز رائیونڈ لاہور کا دورہ کیا جہاں انہوں نے تبلیغی جماعت کے اکابرین مولانا محمد احمد بٹلر، مولانا عبید اللہ خورشید، ڈاکٹر سلیم اور دیگر شخصیات سے ملاقات کی ،محسن نقوی نے اس موقع پر دعا کی کہ اللہ تعالیٰ اجتماع کے منتظمین کو نیک کام جاری رکھنے کا اجر دے ۔
لاہور: ملاقات میں تبلیغی جماعت کے اکابرین نے وزیر داخلہ کو نومبر میں ہونے والے عالمی تبلیغی اجتماع کے انتظامات سے آگاہ کیا ۔
محسن نقوی نے تبلیغی جماعت کی دین اسلام کیلئے خدمات کو سراہتے ہوئے کہا کہ وہ بیرون ممالک سے آنے والے وفود کیلئے ہر ممکن تعاون فراہم کریں گے اور جہاں بھی ویزے کا مسئلہ درپیش آیا، اسے ترجیحی بنیادوں پر حل کرایا جائے گا ۔
ان کا کہنا تھا کہ یہ مہمان ہمارے لئے معزز ہیں اور ان کیلئے ہر سطح پر آسانیاں پیدا کی جائیں گی، وہ ہر سال باقاعدگی سے تبلیغی اجتماع میں شرکت کرتے ہیں اور انشا اللہ رواں برس بھی آئیں گے ۔
محسن نقوی نے اس موقع پر دعا کی کہ اللہ تعالیٰ اجتماع کے منتظمین کو نیک کام جاری رکھنے کا اجر دے ۔
اس موقع پر مولانا محمد احمد بٹلر نے کہا کہ سب نے اللہ تعالیٰ کی جانب لوٹ جانا ہے اور ہمیں دین اسلام اور انسانیت کی خدمت کو اپنا شعار بنانا چاہیے، اللہ پاک کے بتائے ہوئے راستے پر چلنے میں ہی بھلائی اور کامیابی ہے ۔
