ضلع کرم میں سکیورٹی فورسز کی کارروائی میں 7 دہشتگرد مارے گئے جبکہ دہشتگردوں کے ساتھ فائرنگ کے تبادلے میں پاک فوج کے کیپٹن نعمان سمیت 6 جوان شہید ہوگئے ۔
پاک فوج کے شعبہ تعلقات عامہ کی جانب سے جاری بیان کے مطابق سکیورٹی فورسز نے کرم کے علاقے دوگر میں بھارتی پراکسی کے دہشتگردوں کے خلاف خفیہ اطلاع کی بنیاد پر آپریشن کیا گیا ۔
آئی ایس پی آر نے کے بیان کے مطابق سکیورٹی فورسزکی بروقت اور مؤثر کارروائی کے نتیجے میں 7 دہشتگرد ہلاک ہو گئے ۔
آئی ایس پی آر کا کہنا ہے کہ شدید فائرنگ کے تبادلے میں کیپٹن نعمان سلیم سمیت 6 بہادرجوانوں نے جامِ شہادت نوش کیا، شہدا میں حوالدار امجد علی، نائیک وقاص احمد، سپاہی اعجازعلی ، سپاہی محمد ولید اور سپاہی محمد شہباز شامل ہیں ۔
آئی ایس پی آر نے مزید بتایا کہ کیپٹن نعمان سلیم ایک بہادر اور نوجوان میڈیکل آفیسر تھے، کیپٹن نعمان محاذ پرمیڈیکل خدمات انجام دینے کے ساتھ دلیرانہ اندازمیں لڑے اور جامِ شہادت نوش کیا ۔
آئی ایس پی آر کا مزید کہنا تھا کہ علاقے میں موجود دیگربھارتی حمایت یافتہ دہشتگردوں کی تلاش اورخاتمے کے لیے کلیئرنس آپریشن جاری ہے ۔
سکیورٹی فورسز اور قانون نافذ کرنے والے ادارے انسدادِ دہشتگردی کی مہم پوری قوت سے جاری رکھے ہوئے ہیں، ملک سے بیرونی حمایت یافتہ دہشتگردی کے ناسور کا مکمل خاتمہ کیا جائے گا ۔
