مفکر پاکستان علامہ ڈاکٹر محمد اقبال کا 148واں یومِ پیدائش بھرپور عقیدت و احترام کے ساتھ منایا گیا، ملک بھر میں عوام نے علامہ محمد اقبال کی خدمات اور شاعری کو خراج عقیدت پیش کیا ۔
شاعرِ مشرق کے یومِ ولادت پر صدر مملکت آصف زرداری، وزیر اعظم شہباز شریف اور دیگر اعلیٰ حکام نے اپنے پیغامات میں علامہ اقبال کو بھرپور خراج عقیدت پیش کیا ۔
صدر مملکت آصف زرداری نے کہا کہ شاعرِ مشرق نے برصغیر کے مسلمانوں میں آزادی کا شعور بیدار کیا، علامہ اقبال کا پیغام آج بھی رہنمائی کا سرچشمہ ہے ۔
وزیراعظم شہباز شریف نے اپنے پیغام میں کہا کہ علامہ اقبال نے علیحدہ وطن کا خواب روشن کیا، خود انحصاری، خودآگاہی اوراتحادعلامہ اقبال کی تعلیمات ہیں ۔
وفاقی وزیر داخلہ محسن نقوی نے کہا کہ پاکستان علامہ اقبال کے خواب کی تعبیر ہے جب کہ گورنر، وزرائے اعلیٰ اور دیگر شخصیات نے بھی علامہ اقبال کو بھرپور خراج عقیدت پیش کیا ۔
وزیر دفاع خواجہ آصف نے سیالکوٹ میں علامہ قبال کے یوم پیدائش پر منعقدہ تقریب کے بعد میڈیا سے گفتگو میں کہا کہ ہمیں اقبال کے افکار پر چلتے ہوئے کشمیر اور فلسطین کے مسلمانوں کےلیے جدوجہد جاری رکھنی ہے ۔
خواجہ آصف کا مزید کہنا تھا کہ زندہ قومیں اپنے محسنوں کو یاد رکھتی ہیں، محسنوں کو فراموش کرنے والی قومیں منزل کھو دیتی ہیں ۔
