وزیراعظم شہباز شریف نے 27 ویں آئینی ترمیم میں وزيراعظم کو فوجداری مقدمات سے استثنیٰ دینے کی ترمیم فوری واپس لینے کی ہدایت کر دی ۔
سماجی رابطے کی ویب سائٹ ایکس پر وزیراعظم شہباز شریف نے اپنے بيان میں کہا کہ مجھے آذربائیجان سے واپسی پر معلوم ہوا کہ وزیراعظم کے استثنیٰ کے حوالے سے ترمیمی شق سینیٹ میں پیش کی گئی ۔
وزیراعظم نے اپنے بیان میں کہا کہ مذکورہ شق وفاقی کابینہ کے اجلاس سے منظور شدہ آئینی مسودے میں شامل نہیں تھی ۔
وزیراعظم شہباز شریف نے سینیٹرز کے خلوص کا شکریہ ادا کرتے ہوئے انہیں یہ ترمیم فی الفور واپس لینے کی ہدایت کی ہے ۔
شہبازشریف کا اپنے بیان میں مزید کہنا تھا کہ منتخب وزیراعظم یقیناً قانون اور عوام کی عدالت میں جوابدہ ہے ۔
ذرائع کا کہنا ہے کہ وزیراعظم کے فیصلے سے وفاقی وزیر قانون و انصاف اعظم نذیر تارڑ کو بھی آگاہ کر دیا گیا ہے ۔
