وزیرِاعظم شہباز شریف نے خطے میں بڑھتے ہوئے عالمی بحرانوں پر گہری تشویش کا اظہار کرتے ہوئے کہا ہے کہ غیر حل شدہ سیاسی تنازعات بارود کے ڈھیر میں تبدیل ہو جاتے ہیں۔
اقوامِ متحدہ کے زیرِاہتمام پائیدار ترقی، عالمی امن اور خوشحالی کے موضوع پر منعقدہ خصوصی تقریب سے خطاب کرتے ہوئے انہوں نے کہا کہ سفارتکاری، مذاکرات اور مکالمہ ہی تنازعات کی روک تھام کا واحد مؤثر راستہ ہے۔ ان کا کہنا تھا کہ پائیدار ترقی عدل و انصاف پر مبنی ہوتی ہے اور اس کے بغیر مستقل امن کا قیام ممکن نہیں، ورنہ امن محض ایک خواب بن کر رہ جاتا ہے۔
وزیرِاعظم نے افسوس کا اظہار کرتے ہوئے کہا کہ پاکستان کے بعض ہمسایہ ممالک دریائے سندھ کے پانی کی تقسیم کو بطور ہتھیار استعمال کر رہے ہیں، جبکہ یہ پانی پاکستان کے چوبیس کروڑ عوام کی زندگی اور روزگار کی ضمانت ہے۔ انہوں نے کہا کہ پانی جیسے اہم وسائل کو سیاسی دباؤ کے لیے استعمال کرنا خطے کے امن اور استحکام کے لیے نقصان دہ ہے۔
تقریب کے موقع پر وزیرِاعظم نے اقوام متحدہ اور پاکستان کے مختلف اداروں کے درمیان تعاون سے متعلق معاہدوں پر دستخط کی تقریب میں بھی شرکت کی۔ انہوں نے اس عزم کا اعادہ کیا کہ پاکستان عالمی امن، پائیدار ترقی اور بین الاقوامی تعاون کے فروغ کے لیے اپنا فعال کردار جاری رکھے گا۔
