شمالی وزیرستان:میران شاہ میں اتمانزئی مشران اور سیاسی رہنماؤں کی عسکری و سول حکام کے ساتھ جرگہ ہوا جس میں امن و امان اور گیس پائپ لائن سمیت اہم نکات پر تفصیلی تبادلہ خیال کیا گیا ۔
جرگے میں جی او سی سیون ڈویژن میجر جنرل عادل افتخار، ڈی سی یوسف کریم کنڈی، ڈی پی او روخانزیب خان ،
ملک نصراللہ خان، ملک اکبر خان، ملک جان فراز اور دیگر ملکان و سیاسی رہنماؤں نے شرکت کی ۔
اتمانزئی مشران نے امن و امان سمیت اہم مسائل کے حوالے سے سرکاری حکام کو آگاہ کیا۔
جی او سی میجر جنرل عادل افتخار نے اس موقع پر کہا کہ اتمانزئی قوم کے آئینی مطالبات کو ہرصورت پورا کیا جائے گا،
امن و امان کا قیام پاک فوج کی اولین ترجیح ہے۔
جی او سی سیون ڈویژن کا کہنا تھا کہ اس مقصد کیلئے پاک فوج دن رات کوشاں ہے، مل بیٹھ کر امن و امان سمیت تمام مسائل با آسانی حل ہو سکتے ہیں۔
اتمانزئی مشران نے بند شناختی کارڈز کی جلد بحالی ،مرکزی شاہراہوں سے غیر ضروری چیک پوسٹوں کے ہٹانے ،لاپتہ افراد کی بازیابی کیلئے کوششیں تیز کرنے کے مطالبات جرگے کے سامنے رکھے۔
ذرائع کے مطابق جرگے کے دوران فریقین کے درمیان باہمی اعتماد اور تعاون کی فضا دیکھی گئی۔
جرگے کے فریقین نے عنقریب ایک اور جرگہ منعقد کرنے پر بھی اتفاق کیا۔
