امریکی صدر ڈونلڈ ٹرمپ کی موجودگی میں تھائی لینڈ اور کمبوڈیا کے درمیان امن معاہدے پر ملائیشیا میں دستخط کر دیئے گئے، اس موقع پر ڈونلڈ ٹرمپ کا کہنا تھا کہ پاکستان کے وزیراعظم اور فیلڈ مارشل عظیم شخصیات ہیں، پاکستان اور افغانستان کے درمیان جنگ ہوئی لیکن جلد بند ہو گئی، سعودی عرب نے پاک افغان جنگ بندی میں اہم کردار ادا کیا ۔
کوالالمپور میں معاہدے پر دستخط کی تقریب سے خطاب کرتے ہوئے امریکی صدر ڈونلڈ ٹرمپ نے کہا کہ دنیا بھر میں امن کا خواہاں ہوں، مجھے جنگیں رکوانا پسند ہے، میں نے تجارت کے ذریعے جنگیں رکوائیں، اب تک 8 جنگیں رکوا چکا ہوں ۔
ٹرمپ نے کہا کہ ملائیشیا تھائی لینڈ اور کمبوڈیا کے درمیان امن معاہدے کی نگرانی کرے گا، تھائی لینڈ اور کمبوڈیا امن معاہدے سے لاکھوں جانیں بچ جائیں گی، تھائی لینڈ کی ملکہ کے انتقال پر بھی تعزیت کرتا ہوں ۔
پاکستان کے وزیراعظم اور فیلڈ مارشل عظیم شخصیات ہیں: ۔
امریکی صدر نے دہرایا کہ پاکستان کے وزیراعظم اور فیلڈ مارشل عظیم شخصیات ہیں، پاکستان اور افغانستان کے درمیان جنگ ہوئی لیکن جلد بند ہو گئی، سعودی عرب نے پاک افغان جنگ بندی میں اہم کردار ادا کیا ۔
اس موقع پر ملائیشیا کے صدر انور ابراہیم نے کہا کہ قیام امن کی کوششوں کے لیے امریکی صدر ڈونلڈ ٹرمپ کے مشکور ہیں، غزہ امن معاہدے پر خراج تحسین پیش کرتے ہیں ۔
قبل ازیں ملائیشیا کے دورے سے قبل اپنی سوشل میڈیا ویب سائٹ ٹروتھ سوشل پر جاری ایک پیغام میں ڈونلڈ ٹرمپ کا کہنا تھا کہ وہ زبردست امن معاہدے پر دستخط کے لیے ملائیشیا جا رہے ہیں جس کے متعلق انہیں فخر ہے کہ انہوں نے کروایا تھا ۔
تھائی لینڈ اور کمبوڈیا کے درمیان ایک ہفتے جاری رہنے والی لڑائی کے بعد فوری اور غیر مشروط جنگ بندی پر اتفاق ہو گیا تھا ۔
ٹرمپ نے دھمکی دی تھی کہ اگر دونوں ممالک نے لڑائی نہیں روکی تو امریکی محصولات میں کمی پر جاری بات چیت ختم کر دی جائے گی، دونوں ممالک امریکہ کو برآمدات کرتے ہیں ۔
