اسلام آباد: سپریم کورٹ کی جانب سے جاری اعلامیے کے مطابق چیف جسٹس آف پاکستان جسٹس یحییٰ آفریدی کی زیر صدارت جوڈیشل کمیشن کا اجلاس ہوا، اجلاس میں جوڈیشل کمیشن آف پاکستان نے سپریم کورٹ میں 6 ججز کی تعیناتی کی منظوری دے دی ۔
اعلامیہ میں کہا گیا کہ جوڈیشل کمیشن نے چیف جسٹس پشاور ہائیکورٹ اشتیاق ابراہیم کو سپریم کورٹ جج بنانے کی منظوری دی گئی ،اجلاس میں چیف جسٹس اسلام آباد ہائی کورٹ جسٹس عامر فاروق کو بھی سپریم کورٹ جج بنانے کی منظوری دی گئی ۔
اعلامیے کے مطابق چیف جسٹس سندھ ہائیکورٹ شفیع صدیقی اور بلوچستان ہائیکورٹ کے چیف جسٹس ہاشم کاکڑ کو بھی سپریم کورٹ میں بطور جج تعینات کرنے کی منظوری دی گئی ۔
اعلامیہ میں کہا گیا کہ پشاور ہائیکورٹ کے جج جسٹس شکیل احمد اور سندھ ہائیکورٹ جج صلاح الدین پنور کو بھی سپریم کورٹ جج کی منظوری دی گئی ۔
اعلامیے میں مزید کہا گیا ہے کہ جسٹس میاں گل حسن اورنگزیب کو سپریم کورٹ میں عارضی جج لگانے کی منظوری دی گئی ۔
ذرائع کے مطابق سپریم کورٹ کے سینئر ججز جسٹس منصور علی شاہ اور جسٹس منیب اختر نے جوڈیشل کمیشن اجلاس کا بائیکاٹ کیا، ان کے علاوہ بیرسٹر علی ظفر اور بیرسٹر گوہر نے بھی اجلاس کا بائیکاٹ کیا ۔
واضح رہے کہ ممبر جوڈیشل کمیشن اور پی ٹی آئی کے سینیٹر بیرسٹر علی ظفر نے گزشتہ روز چیف جسٹس کو خط میں آج کا اجلاس موخر کرنے کا مطالبہ کیا تھا ۔
