ویلفیئرکےنام پرسندھ پولیس کو دی گئی زمینوں پر دفاتر اور پیٹرول پمپ قائم ہونیکا انکشاف

 سندھ پولیس کو ویلفیئر کے نام پر دی گئی زمینوں پر  پیٹرول پمپ، دکانیں، گودام، فلیٹ اور دفاتر تعمیر ہونے کا انکشاف ہوا ہے۔آئی جی سندھ کی طرف  سے سندھ ہائیکورٹ میں جمع کرائی گئی رپورٹ کے مطابق سندھ میں 1397 دکانیں، 4 پیٹرول پمپ،338 فلیٹ، 37 گودام اور 162 دفاتر پولیس کی زمین پر  بنائے گئے ہیں۔رپورٹ کے مطابق اس وقت سندھ بھر میں پولیس کی زمین پر 32 مقامات پر کمرشل سرگرمیاں جاری ہیں، کراچی کے علاوہ حیدرآباد، سکھر، دادو، بدین، میرپور خاص، نوابشاہ، خیرپور،گھوٹکی، لاڑکانہ،کشمور  اور جیکب آباد میں بھی سندھ پولیس کی زمین پر کمرشل سرگرمیاں جاری ہیں۔مزید رپورٹ میں بتایا گیا ہے کہ سپریم کورٹ کے احکامات کے بعد تمام دکانداروں کو دکانیں خالی کرنے کا کہا گیا تھا، اس کے برعکس دکانداروں نے نوٹسز کے خلاف سپریم کورٹ سے رجوع کیا تھا اور سپریم کورٹ نے یہ معاملہ سندھ ہائیکورٹ کو بھیجا تھا۔