علی امین گنڈاپورکیخلاف اسلحہ،شراب برآمدگی کیس کی سماعت 17مئی تک ملتوی

وزیرِ اعلیٰ خیبر پختونخوا کیخلاف اسلحہ،شراب برآمدگی کیس کی سماعت 17مئی تک ملتوی کردی گئی ہے۔

اسلام آباد کی ڈسٹرکٹ اینڈ سیشن کورٹ نے وزیرِ اعلیٰ خیبر پختونخوا علی امین گنڈاپور کے خلاف اسلحے اور مبینہ شراب کی برآمدگی کے کیس کی سماعت کو 17مئی تک ملتوی کر دیا ہے۔جوڈیشل مجسٹریٹ صہیب بلال رانجھا نے تھانہ بہارہ کہو میں درج مقدمے کی سماعت کی ہے۔وزیرِ اعلیٰ خیبر پختونخوا علی امین گنڈاپور کے وکیل راجہ ظہور الحسن عدالت میں پیش ہوئے، ملزم کے 342 بیان کیلئے سوالنامہ آج فراہم نہ کیاجاسکا۔

عدالت کے مطابق آئندہ دو سے تین دن میں 342 کے بیان کے لیے سوالنامہ فراہم کردیا جائے گا ، عدالت نے کیس کی سماعت کو 17 مئی تک کیلئے ملتوی کر دیا ہے۔گزشتہ روز عدالت میں وزیرِ اعلیٰ خیبر پختونخوا علی امین گنڈاپور کے خلاف اسلحے اور مبینہ شراب کی برآمدگی کے کیس میں تمام گواہان پر جرح مکمل کی گئی تھی۔یاد رہے کہ وزیرِ اعلیٰ خیبر پختونخوا علی امین گنڈاپور پر اکتوبر 2016ء میں بنی گالہ سے گاڑی سے شراب اور اسلحہ برآمد ہونے کا مقدمہ درج کیا گیا تھا۔جبکہ اس کے برعکس علی امین گنڈا پور نے دعویٰ کیا تھا کہ وہ شہد لے جا رہے تھے جسے پولیس نے ضبط کر لیا تھا۔