خیبر پختونخوا کے مختلف اضلاع اور فاقی دارالحکومت اسلام آباد میں زلزلے کے شدید جھٹکے محسوس کیے گئے جس کے باعث عوام میں خوف و ہراس پھیل گیا ،لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے ۔
زلزلے کے جھٹکے پشاور اور گردونواح میں محسوس کیے گئے، بٹ خیلہ، تخت بھائی، دیرلویر ، بونیر ، رستم اور گردونواح میں بھی زلزے کے جھٹکے محسوس کئے گئے ۔
زلزلہ پیما مرکز کی رپورٹ کے مطابق ریکٹر سکیل پر زلزلے کی شدت 5.2ریکارڈ کی گئی، زلزلے کا مرکز افغانستان تاجکستان کا سرحدی علاقہ ہے، زلزلے کا مرکز زیرزمین 198کلومیٹر تھا ۔
ترجمان پی ڈی ایم اے کی جانب سے جاری بیان کے مطابق 27 مارچ 2025 کو دوپہر 1 بجکر 28 منٹ پر زلزلہ ریکارڈ کیا گیا، زلزلے کی شدت 5.2، گہرائی 198 کلومیٹر ریکارڈ کی گئی ۔
پی ڈی ایم اے نے کہا کہ زلزلے کا مرکز ہندوکش ریجن، افغانستان ہے، زلزلے کے جھٹکے صوبہ کے بیشتر علاقوں میں محسوس کیے گئے ۔
پی ڈی ایم اے نے کہا کہ زلزلے کے باعث کسی جانی و مالی نقصان کی اطلاع نہیں ملی، پی ڈی ایم اے کا ایمرجنسی اپریشن تمام اضلاع کی ضلعی انتظامیہ کے ساتھ رابطے میں ہے. عوام کسی بھی ناخوشگوار واقعے کی اطلاع 1700 پر دیں ۔
