اسلام آباد میں وزیراعظم شہبازشریف کی زیر صدارت وفاقی کابینہ کا اجلاس ہوا جس میں 26 ویں آئینی ترمیم کے مسودے اور ملکی سیاسی صورتحال کا جائزہ لیا گیا۔
وفاقی کابینہ کے اجلاس کے دوران 26 ویں آئینی ترمیم کی منظوری دے دی ۔ اس کے بعد مسودے کو سینیٹ اور قومی اسمبلے کے اجلاس میں پیش ہوگا اور دونوں ایوانوں سے بھی منظوری ہوگی ۔
اجلاس سے قبل وزیراعظم شہباز شریف کی صدر مملکت آصف علی زرداری سے ملاقات ہوئی جس میں آئینی ترمیم پر تفصیلی مشاورت ہوئی اور صدر کو اعتماد میں لیا گیا۔
وزیراعظم محمد شہباز شریف کی زیرِ صدارت وفاقی کابینہ کا اجلاس اسلام آباد میں منعقد ہوا جس میں وزیرِ قانون و انصاف نے 26 ویں آئینی ترمیم پر دوبارہ تفصیلی بریفنگ دی۔
وفاقی کابینہ نے حکومتی اتحادی جماعتوں بشمول پاکستان پیپلز پارٹی کا 26 ویں آئینی ترمیم کا مجوزہ مسودہ منظور کر لیا۔ وزیرِ اعظم نے اتحادی جماعتوں کے سربراہاں کا خصوصی شکریہ ادا کیا۔
وزیراعظم نے کہا کہ پاکستان کی ترقی و خوشحالی اور ملکی حالات کی بہتری کے لیے کابینہ نے بہترین فیصلہ کیا، پوری قوم کو 26 ویں آئینی ترمیم کی کابینہ سے منظوری پر مبارکباد دیتا ہوں۔
پرائم منسٹر آفس سے جاری بیان میں وزیراعظم نے مزید کہا کہ کابینہ نے ملکی ترقی اور عوامی فلاح کے حلف کی پاسداری کرتے ہوئے ملکی وسیع تر مفاد میں فیصلہ کیا، اللہ کے فضل و کرم سے ملکی معیشت کے استحکام کے بعد ملک کے آئینی استحکام اور قانون کی حکمرانی کے لیے ایک سنگ میل عبور ہوا۔
وزیراعظم نے کہا کہ عوام سے کیے گئے اپنے وعدے کے مطابق ملک کی ترقی، خوشحالی اور استحکام کے لیے محنت جاری رکھیں گے۔
وزیرِ اعظم نے چیئرمین پیپلز پارٹی بلاول بھٹو زرداری، نائب وزیراعظم و وزیر خارجہ اسحاق ڈار، وزیر قانون و انصاف اعظم نذیر تارڑ، وزیرداخلہ محسن رضا نقوی، مشیر وزیراعظم رانا ثناء اللہ اور وزیر اطلاعات و نشریات عطاء اللہ تارڑ کی کوششوں کو سراہا۔
اجلاس کے بعد گفتگو کرتے ہوئے وفاقی وزیر مصدق ملک نے کہا کہ حکومت نے اپنا مسودہ منظور کر لیا ہے، کابینہ نے اس مسودے کی منظوری دی جو پیپلزپارٹی، حکومت اور اتحادی جماعتوں نے مل کر بنایا۔
دوسری جانب چئیرمین پیپلز پارٹی نے سب کو مبارکباد دی ہے اور کہا ہے کہ مولانا فضل الرحمان کے بہت شکرگزار ہیں۔
بلاول بہٹو زرداری کا کہنا تھا کہ آج تاریخ دن ہے ، ترامیم میں متنازعہ نکات نہیں ہیں ۔ جے یو آئی نے ترمیم کے مسودے میں بہت محنت کی ہے اور ساتھ دیا ہے ۔
