خیبر ضلع کے علاقے باڑہ شنکو میں چار افراد کی لاشیں برآمد ہوئی ہیں۔ ڈسٹرکٹ پولیس آفیسر (ڈی پی او) خیبر کے مطابق چاروں افراد کو فائرنگ کرکے قتل کیا گیا، جن کی لاشیں بعد ازاں علاقے سے ملی ہیں۔
پولیس کا کہنا ہے کہ لاشوں کو پوسٹ مارٹم کے لیے قریبی ہسپتال منتقل کر دیا گیا ہے، جبکہ واقعے کی تحقیقات شروع کر دی گئی ہیں۔
پولیس کے مطابق قتل کی وجوہات تاحال معلوم نہیں ہو سکیں، جبکہ جاں بحق افراد کی شناخت کا عمل بھی جاری ہے۔ پولیس حکام کا کہنا ہے کہ واقعے کے تمام پہلوؤں سے تفتیش کی جا رہی ہے اور مزید تفصیلات تحقیقات مکمل ہونے کے بعد سامنے آئیں گی۔
