کراچی کے مختلف علاقوں میں شدید طوفانی بارش کے باعث پیش آنے والے حادثات میں 19 افراد جاں بحق جبکہ 60 سے زائد زخمی ہو گئے ہیں۔
رپورٹس کے مطابق نارتھ ناظم آباد، نارتھ کراچی، سرجانی ٹاؤن، ایف بی ایریا، صدر اور کلفٹن سمیت کئی علاقوں میں تیز بارش اور آندھی نے نظامِ زندگی درہم برہم کر دیا۔
تیز ہواؤں کے باعث مختلف مقامات پر درخت گر گئے، جس سے ٹریفک کی روانی شدید متاثر ہوئی۔ کلفٹن میں ڈرائیونگ لائسنس برانچ کے قریب درخت گرنے سے دو افراد شدید زخمی ہو گئے۔
حکام کے مطابق مختلف حادثات میں مجموعی طور پر 19 افراد جان کی بازی ہار گئے جبکہ درجنوں افراد زخمی ہوئے ہیں، جنہیں قریبی اسپتالوں میں منتقل کر دیا گیا ہے۔
محکمہ موسمیات نے پیشگوئی کی ہے کہ کراچی میں آج بھی تیز ہواؤں کے ساتھ مزید بارش کا امکان ہے، جس کے پیش نظر شہریوں کو احتیاطی تدابیر اختیار کرنے کی ہدایت کی گئی ہے۔
