پراونشل ڈیزاسٹر مینجمنٹ اتھارٹی خیبرپختونخوا نے 15 اگست سے اب تک بارشوں سے ہونے والے جانی نقصانات کی تازہ رپورٹ جاری کردی، رپورٹ کے مطابق صوبہ بھر میں حالیہ بارشوں اور سیلاب کے دوران 400 سے زائد افراد جاں بحق اور 240 سے زائد زخمی ہو چکے ہیں ۔
پشاور: پی ڈی ایم اے کے مطابق بارشوں سے مختلف حادثات میں اب تک 406 افراد جاں بحق اور 247 افراد زخمی ہوئے، جاں بحق افراد میں 305 مرد، 55 خواتین اور 46 بچے شامل ہیں ۔
رپورٹ میں بتایا گیا ہے کہ زخمیوں میں 179 مرد، 38 خواتین اور 30 بچے شامل ہیں جب کہ بارشوں اور فلش فلڈ کے باعث 3 ہزار 526 گھروں کو نقصان پہنچا ہے ۔
چیف سیکرٹری خیبرپختونخوا شہاب علی شاہ کے مطابق صوبے میں سیلاب متاثرین میں امدادی رقم کی تقسیم کا سلسلہ جاری ہے ، 307 جاں بحق افراد کے لواحقین میں 61 کروڑ 40 لاکھ روپے تقسیم کیے جبکہ 89 جاں بحق افراد کے ورثا کو بھی جلد امدادی رقم دی جائے گی ۔
چیف سیکریٹری خیبرپختونخوا نے یہ بھی کہا کہ بونیر میں 237 جاں بحق افراد کے ورثا کو 33 کروڑ 20 لاکھ روپے دیے گئے جبکہ سوات میں 20 جاں بحق افراد کے لواحقین کو 4 کروڑ روپے کی امداد دی گئی، شانگلہ میں 36 جاں بحق افراد کے ورثاء کو 7 کروڑ 20 لاکھ روپے تقسیم کیے گئے ۔
شہاب علی شاہ کے مطابق صوابی میں 42 ، دیر لوئر میں 5 ، بٹگرام میں 3 جاں بحق افراد کے خاندانوں میں بھی رقم تقسیم کی گئی، باجوڑ میں سیلاب سے جاں بحق22 افراد میں سے 21 کے لواحقین کو بھی امدادی رقم دی گئی، مانسہرہ میں 25 جاں بحق افراد میں سے 14 کے ورثا میں 2 کروڑ 80 لاکھ روپے تقسیم کیے ۔
انہوں نے مزید کہا کہ زخمیوں میں بھی امدادی چیک تقسیم کردیے گئے ہیں، سیلاب زدہ علاقوں میں متاثرین کا خیال رکھا جا رہا ہے، حکومت متاثرہ علاقوں کی دوبارہ بحالی کے لیے تمام وسائل بروئے کار لائے گی ۔
