Latest Urdu news from Pakistan - Peshawar, Lahore, Islamabad

لیڈی ریڈنگ ہسپتال کو جاری کردہ سرکاری ادویات کی غیر قانونی فروخت، ہسپتال کے 3 ملازمین سمیت 6 افراد گرفتار

پشاور: لیڈی ریڈنگ ہسپتال کو جاری کردہ سرکاری ادویات کی غیر قانونی فروخت، اینٹی کرپشن سرکل پشاور کی چھاپہ مارکاروائیاں، ہسپتال کے 3 ملازمین سمیت 6 افراد گرفتار، ملزمان لاکھوں روپے مالیت سرکاری ادویات کی خوردبرد میں ملوث تھے۔

تفصیلات کے مطابق سرکاری ادویات کی غیر قانونی فروخت میں ملوث عناصر کے خلاف کریک ڈاؤن کا آغاز کر دیا گیا ہے اور اس مکروہ دھندے میں ملوث پرائیوٹ ہسپتالوں کا ریکارڈ بھی اکٹھا کیا جا رہا ہے۔

اینٹی کرپشن سرکل پشاور نے متعدد چھاپہ مار کاروائیاں کرتے ہوئے سرکاری ہسپتال کے 3 ملازمین سمیت 6 ملزمان گرفتار کرلئے جو لیڈی ریڈنگ ہسپتال کو جاری کی گئی سرکاری ادویات غیر قانونی طور پر فروخت کرتے تھے۔

گرفتار ملزمان میں سلیمان، عبدالجبار، عابد، عماد، طاہر اور یوسف جان شامل جبکہ ملزم یوسف جان گینگ کا ماسٹر مائنڈ ہے۔ ملزم سلیمان، عبد الجبار اور عابد لیڈی ریڈنگ ہسپتال میں بطور ٹیکنیشن ڈیوٹی سر انجام دے رہے تھے۔ ملزمان کی نشاندہی پر پشاور کی مختلف پرائیویٹ ہسپتالوں میں چھاپے مارے گئے ہیں۔ ملزم عماد کو ڈبگری گارڈن پشاور میں واقع الشفاء ہیلتھ کئیر سے گرفتار کیا گیا جسکی نشاندہی پر دیگر ملزمان کو گرفتار کیا گیا۔ ملزمان کی نشاندہی پر شفاء میڈیکوز کے گودام سے بھی بھاری مقدار میں سرکاری ادویات برآمد کی گئی اور گودام کو سیل کر دیا گیا۔

الشفاء ہیلتھ کئیر ہسپتال سے بھی بھاری مقدار میں سرکاری ادویات برآمد اور ملزمان گرفتار کرکے تفتیش کا آغاز کر دیا گیا۔ اسی طرح دیگر ہسپتالوں میں بھی چھاپہ مار کاروائیوں کا آغاز کر دیا گیا۔

ترجمان ایف آئی اے کا کہنا ہے کہ قومی خزانے کو نقصان پہنچانے والے عناصر کے خلاف سخت کاروائی عمل میں لائی جائے گی۔

جواب چھوڑیں

آپ کا ای میل ایڈریس شائع نہیں کیا جائے گا.