لاہور: انسداد دہشتگردی عدالت نے جناح ہاؤس حملہ کیس میں بانی پی ٹی آئی عمران خان کی ضمانت خارج کر دی ہے۔ فیصلے کے مطابق عدالت کو بانی پی ٹی آئی کو ضمانت دینے کا کوئی جواز نہیں ملا۔ عدالت ضمانت مسترد کرتی ہے۔
انسداد دہشت گردی عدالت لاہور کے جج منظر علی گل نے 7 صفحات پر مشتمل تحریری فیصلہ جاری کیا۔ فیصلے کے مطابق بانی پی ٹی آئی قصور وار ہیں، بانی پی ٹی آئی عام آدمی نہیں ہے، وہ سابق چیرمین پی ٹی آئی اور اپنی جماعت کے بانی ہیں۔
تحریری فیصلے میں کہا گیا ہے کہ بانی پی ٹی آئی کا بیان اپنے ورکرز اور سپورٹرز کے لیے اہمیت رکھتا ہے، پارٹی کی دوسری قیادت چیئرمین یا بانی کا بیان مسترد کرنے کا سوچ نہیں۔ پولیس کے مطابق اسی روز جلاؤ گھیراؤ کے کئی واقعات ہوئے۔ مظاہرین نے صرف فوجی تنصیبات،سرکاری ادارے اور پولیس اہلکاروں پر حملے کیے، کسی پرائیویٹ املاک کو نقصان نہیں پہچایا۔
عدالت کا کہنا ہے کہ پراسکیوشن کے مطابق سازش درخواست گزار کی زمان پارک رہائش گاہ سے رچائی گئی، جس کے نتیجے میں جرم رونما ہوا، عدالت کا بانی پی ٹی آئی کو ضمانت دینے کا کوئی جواز نہیں ملا، عدالت ضمانت مسترد کرتی ہے۔
فیصلے میں کہا گیا ہے کہ درخواست گزار کے وکیل نے بتایا کہ جب یہ واقعات ہوئے تو بانی پی ٹی آئی تو گرفتار تھے، اس دلائل پر پراسکیوشن نے الزام لگایا کہ بانی پی ٹی آئی نے گرفتاری سے پہلے سازش کی، اس سازش کے بعد ایسے واقعے کا ارتکاب ہوا۔ درخواست گزار کے وکیل کے اس دلائل میں کوئی وزن نہیں ہے۔
عدالت کا کہنا ہے کہ درخواست گزار کے وکیل نے دلائل دیا کہ مختلف عدالتوں سے بانی پی ٹی آئی کی بہت سے کیسز میں ضمانتیں ہوچکی ہیں، عدالت کا ماننا ہے ہر ایک کیس کا فیصلہ اس کے میرٹ کی روشنی میں ہوتا ہے۔ ہر مقدمے میں جرم کی شدت اور طریقہ مختلف ہوتا ہے۔
