انسپکٹر جنرل آف پولیس اسلام آباد علی ناصر رضوی نے پاک فضائیہ کے گروپ کیپٹن عاصم کے قتل میں ملوث ملزم سعد عباسی کی گرفتاری کی تصدیق کرتے ہوئے کہا ہے کہ ملزم کو اسلام آباد پولیس نے 9 گھنٹے میں گرفتار کیا ۔
اسلام آباد میں نیوز کانفرنس میں آئی جی پولیس علی ناصر رضوی نے کہا کہ ملزم خاتون کو زبردستی اپنے ساتھ لے جانا چاہتا تھا، خاتون بضد تھی کہ میں کسی اور جگہ نہیں جاؤں گی ۔
انہوں نے کہا کہ ملزم سعد عباسی اور خاتون ایک ساتھ آفس میں کام کرتے تھے، گروپ کیپٹن عاصم طارق شہید نے خاتون کو ملزم سے بچایا ۔
آئی جی اسلام آباد نے مزید کہا کہ آج صبح 11 بجکر 21 منٹ پر پاک فضائیہ کے گروپ کیپٹن عاصم کو سعد نامی ملزم نے فائرنگ کرکے شہید کیا تھا، یہ کیس ہمارے لیے اہم اور چیلنجنگ تھا، حاضر سروس گروپ کیپٹن کا فائرنگ میں شہید ہونا تشویش ناک بات تھی ۔
انہوں نے کہا کہ ملزم اور خاتون کھنہ کے علاقے میں رہتے اور ایک ساتھ ڈیوٹی پر آتے تھے، اسلام آباد پولیس نے قتل کے ملزم کو 9 گھنٹے میں گرفتار کرلیا ، ملزم سے مزید تفتیش جاری ہے ۔
