اسرائیلی وزیراعظم نیتن یاہو نے وائٹ ہاوس سے قطر کے وزیراعظم محمد بن عبد الرحمان آل ثانی کو ٹیلیفون کرکے دوحہ پر حملےکی معافی مانگ لی ۔
غیر ملکی خبر رساں ادارے نے اسرائیلی میڈیا کے حوالے سے بتایا ہے کہ اسرائیلی وزیر اعظم نیتن یاہو نے قطر کے وزیر اعظم محمد بن عبد الرحمان آل ثانی سے دوحہ میں اسرائیلی فضائی حملے اور ایک قطری سکیورٹی اہلکار کی ہلاکت پر معافی مانگی ہے ۔
رپورٹ کے مطابق نیتن یاہو امریکی صدر ڈونلڈ ٹرمپ سے ملاقات کے لیے وائٹ ہاؤس پہنچے تھے، جہاں سے انہوں نے قطری وزیر اعظم کو فون کیا اور دوحہ پر اسرائیلی حملے کے حوالے سے معذرت کی ۔
یاد رہے کہ 9 ستمبر کو اسرائیل نے قطری دارالحکومت دوحہ میں فلسطینی مزاحمتی تنظیم حماس کے مرکزی دفتر پر فضائی حملہ کیا تھا، جس میں حماس رہنما خلیل الحیہ کے بیٹے سمیت تنظیم کے پانچ ارکان اور ایک قطری سکیورٹی اہلکار شہید ہوئے تھے ۔
حماس نے اس حملے کے حوالے سے بتایا کہ اس کا ہدف تنظیم کی اعلیٰ قیادت تھی، تاہم تمام رہنما محفوظ رہے۔ حملے کے وقت حماس کی قیادت امریکا کی طرف سے پیش کیے گئے غزہ جنگ بندی منصوبے پر غور کر رہی تھی ۔
